ბანკ "ქართუში" შექმნილ ვითარებასთან დაკავშირებით საპარლამენტო ოპოზიცია ეროვნული ბანკის პრეზიდენტს გიორგი ქადაგიძეს კიდევ ერთხელ იწვევს.
ფრაქცია "ერთობა სამართლიანობისთვის" ხვალ პარლამენტში გაფართოებულ სხდომას გამართავს, სადაც ეროვნული ბანკის პრეზიდენტს გიორგი ქადაგიძეს კიდევ ერთხელ იწვევს.
როგორც ცაგარეიშვილმა პარლამენტში გამართულ პრესკონფერენციაზე განმარტა, ეროვნულ ბანკში წერილების გაგზავნასთან ერთად, ფრაქციის აპარატი ეროვნული ბანკის საზოგადოებასთან ურთიერთობის სამსახურის ხელმძღვანელსაც არაერთხელ ესაუბრა, თუმცა, ამ დრომდე აცხადებენ, რომ სხდომაში მონაწილეობის თაობაზე ჯერ მხოლოდ ფიქრობენ და კონკრეტული გადაწყვეტილება მიღებული არა აქვთ.
ფრაქციის გაფართოებული სხდომაში მონაწილების მიღებაზე ფრაქციის თავმჯდომარე გიორგი ცაგარეიშვილი ქადაგიძეს ოფიციალური წერილით დღეს უკვე მესამედ მიმართავს.
"როცა ბანკი გაკოტრდება, ქადაგიძის პასუხები აღარავისთვის საინტერესო აღარ იქნება" - განაცხადა ცაგარეიშვილმა.
ცაგარეიშვილის თქმით, "ქართუს" კუთვნილი თანხების დაკავებიდან თვენახევარი გავიდა და საგამოძიებო კუთხით არც ერთი კონკრეტული ნაბიჯი გადადგმული არ არის.
ფრაქციის გაფართოებული სხდომა ხვალ, პარლამენტში 13:00 საათზე გაიმართება, სადაც გიორგი ქადაგიძის გარდა, უფლებათა დამცველები და საფინანსო სფეროს წარმომადგენლებიც არიან მიწვეული.
