უკრაინის უმაღლესმა რადამ მხარი არ დაუჭირა ქვეყნის სისხლის სამართლის კოდექსში ცვლილებების შეტანას, რომლებიც იმ სტატიის დეკრიმინალიზაციას ითვალისწინებს, რომლითაც უკრაინის ექს-პრემიერი იულია ტიმოშენკო სასჯელს იხდის.
მას შემდეგ რაც, საპარლამენტო უმრავლესობამ უკვე მერამდენედ უარი თქვა ოპოზიციის დეპუტატების მიერ წარმოდგენილი ამ ცვლილებების მიღებაზე, იულია ტიმოშენკოს ბლოკის წევრებმა პროტესტის ნიშნად სხდომა დატოვეს.
ტიმოშენკოს მომხრე დეპუტატები აცხადებდნენ, რომ დღევანდელი ხმის მიცემის პროცესის შემდეგ უკრაინაშიც და მის ფარგლებს გარეთ აბსოლუტურად ცხადი გახდა, რომ ამ ქვეყანაში, დემოკრატიაზე, ადამიანის უფლებებზე და დემოკრატიული ფასეულობების დაცვაზე საუბარი მხოლოდ ილუზიაა და სხვა არაფერი.
"ეს დღე ისტორიაში უნდა დავაფიქსიროთ, როგორც ავტორიტარიზმის სრულად და მთლიანობაში ლეგიტიმაციის დღე. დღეიდან უნდა დავივიწყოთ სიტყვის თავისუფლების შესახებ, თავისუფალი სასამართლოს შესახებ და ნამდვილი პარლამენტარიზმის შესახებ და მთავარი არის ის, რომ უკრაინას ევროპული არჩევანი მოჰპარეს", _ განაცხადა ტიმოშენკოს მომხრე ფრაქციის თავმჯდომარის მოადგილემ ანდრეი კოჟემიანინმა.
