დუშეთის პირველ საჯარო სკოლაში გათბობის სისტემა დაზიანდა. ამის გამო, დღეს სამი გაკვეთილის შემდეგ სკოლაში სასწავლო პროცესი შეწყდა. ამის შესახებ ინფორმაციას მცხეთა-მთიანეთის საინფორმაციო ცენტრი ავრცელებს.
"ჩვენ გვაქვს უფლება, რომ ექსტრემალურ სიტუაციაში სწავლის პროცესი შევწყვიტოთ. თუ გათბობის სისტემა ვერ გაკეთდება, სწავლას რამდენიმე დღით შევწყვეტთ და გაცდენილ საათებს შემდეგ შაბათის ხარჯზე ავანაზღაურებთ", - განაცხადა დუშეთის პირველი საჯარო სკოლის დირექტორმა ლალი ებიტაშვილმა.
დუშეთის პირველ საჯარო სკოლაში 500 ბავშვი სწავლობს. სკოლაში 20 საკლასო ოთახია. დირექტორის თქმით, დღეს მხოლოდ 4 საკლასო ოთახი არ თბებოდა.
ებიტაშვილმა განაცხადა, რომ სკოლის ადმინისტრაცია ხვალიდან ყველა საკლასო ოთახში დენის გამათბობელს შეიტანს.
