საქართველოს პრეზიდენტი მიხეილ სააკაშვილი დაეთანხმა ნატო-ს გენერალურ მდივან ანდერს ფოგ რასმუსენს და განაცხადა, რომ ნატო-ს არაწევრ ქვეყანას ჩრდილოატლანტიკური ორგანიზაციის გაფართოების თაობაზე ვეტოს უფლება არ აქვს.
"ამის ჩაგონებას ცდილობს ის ხალხი, ვისაც არ გააჩნია საკუთარი პოლიტიკური პლატფორმა. ვინც გვეუბნება, რომ არაფერს აზრი არ აქვს, არ აქვს აზრი არც ცვლილებებს, არც რეფორმებს, არც განვითარებას, არც წინსვლას და ყველაფერი დამთავრდება იმით, რომ არაფრით დამთავრდება. მაგრამ საქართველო არასდროს არ ყოფილა ასე ახლოს მრავალსაუკუნოვანი სანუკვარი მიზნის ასრულებასთან, რომ დავბრუნდეთ ევროპულ სახლში", - განაცხადა სააკაშვილმა.
მისი განცხადებით, რაც უფრო მივუახლოვდებით ამ მიზანს, მით უფრო იქნება მცდელობა ხელების ჩამოშვების და საქართველოს ბედს გადაწყვეტენ სადღაც "ბიძიები, რომლებსაც ჩვენთვის კარგი არაფერი სურთ".
"ნატო-ს პრინციპი ეფუძნება იმას, რომ ყველა დემოკრატიულ ქვეყანას აქვს უფლება, აირჩიოს ნატო-სკენ გზა", - აღნიშნა პრეზიდენტმა.
შეგახსენებთ, რომ 23 ოქტომბერს ნატოში რუსეთის მუდმივმა წარმომადგენელმა დიმიტრი როგოზინმა გააკეთა განცხადება იმის შესახებ, რომ სწორედ რუსეთის დამსახურებაა ის, რომ ვერც უკრაინამ და ვერც საქართველომ ნატოს წევრობას ვერ მიაღწიეს.
"ჩვენ შევძელით იმის მიღწევა, რომ უკრაინა ნატოს წევრი არ არის, ჩვენ შევძელით იმის მიღწევა, რომ საქართველო ნატოს წევრი არ არის, ჩვენ შევძელით იმის მიღწევა, რომ არ დავთმეთ რეკეტსაწინააღმდეგო თავდაცვითი სისტემების შესახებ მიმდინარე მოლაპარაკებებზე, ახლა იქ არსებული ჩიხი სწორედ ჩვენი პოზიციითაა გამოწვეული და იმ კომპრომისებზე წასვლის სურვილის არქონას უკავშირდება, რომლებიც ჩვენს უსაფრთხოებას დააზარალებენ", _ განაცხადა როგოზინმა.
