საქართველოს პრეზიდენტ მიხეილ სააკაშვილის განცხადებით, ინტეგრაცია ნატოში, ისევე როგორც ევროკავშირში, არის ქართველი ხალხის არჩევანი.
"ამას მოწმობს 2008 რეფერენდუმიც. ყველა გამოკითხვა ადასტურებს იმას, რომ მხარდაჭერა ნატოს მიმართ ძლიერდება. ეს არის ლტოლვა, რომელიც არ იფარგლება პოლიტიკურ პარტიებს შორის არსებული ზღუდეებით. როგორც ყველა დემოკრატიაში, ჩვენთანაც არიან პარტიები და ჯგუფები, რომლებიც იძახიან, რომ არ აინტერესებთ ნატო და ეს შორეული პერსპექტივაა. ამ პარტიებს, თუ კარგად დავუკვირდებით, არანაირი პერსპექტივა არ აქვთ. ხოლო ძირითად პოლიტიკურ მოთამაშეებს შორის ამ საკითხთან დაკავშირებით საერთო პოლიტიკური კონსენსუსია", - განაცხადა პრეზიდენტმა ბათუმში გამართულ ჩრდილოატლანტიკური საბჭოს სხდომაზე.
მისი თქმით, საქართველოს ნატოსკენ სწრაფვა არ იცვლება არც მიმდინარე პოლიტიკური და ეკონომიკური ფაქტორებით, არც საერთაშორისო ამინდის ცვალებადობით, არც გაზის ფასებით და არც სხვა ფაქტორებით.
"ეს არის ის ორიენტირი არა მხოლოდ ჩემი მთავრობის, არამედ მთელი ქართველი ერის", - დასძინა პრეზიდენტმა.