"საქართველოში საარსებო მინიმუმი 170 ლარს უტოლდება, ანუ 100 დოლარს, ამიტომ 140 ლარამდე პენსიის გაზრდა არასაკამარისად მიგვაჩნია. "ქართული დასი" კვლავ პრინციპულად მოითხოვს ორი პუნქტის შესრულებას: მინიმალური პენსიის 100 დოლარამდე, ანუ საარსებო მინიმუმამდე გაზრდას და პენსიის გაიზარდას 1-ლი იანვრიდან და არა 1-ლი სექტემბრიდან, რათა პენსიონერებმა უკვე 15 იანვარს შეძლონ 100 დოლარის აღება", - განაცხადა დღეს გამართულ ბრიფინგზე ჯონდი ბაღათურიამ.

რაც შეეხება პენსიონერთა უფასო სამედიცინო დაზღვევას, ბაღათურიას თქმით, ეს "ქართული დასის" ერთ-ერთი მოთხოვნაა და მიესალმება ამ კომპონენტის გაჩენას 100-დოლარიან პენსიასთან ერთად.

ბაღათურია პრეზიდენტსა და მთავრობას კიდევ ერთხელ მოუწოდებს, რომ შეელიონ საკუთარ კომფორტსა და გართობაზე გამოყოფილ ხარჯებს და ეს თანხები მიმართული იქნეს პენსიის 1-ლი იანვრიდან 100 დოლარამდე გაზრდისკენ.

"პენსიონერებს მივმართავ: ამით ბრძოლა არ დასრულებულა, "ქართულმა დასმა" და პენსიონერებმა უნდა გავაგრძელოთ ერთობლივი ბრძოლა, რათა სრულყოფილად ამოქმედდეს "ქართული დასის" საპენსიო რეფორმა, რომლის მიხედვითაც, თქვენი მინიმალური საბაზისო პენსია უნდა გაუტოლდეს 100 დოლარს ანუ საარსებო მინიმუმს. ამ 170 ლარს უნდა ემატებოდეს თითო ნამსახურებ წელიწადზე 2 ლარი, შესაბამისად, 25-წლიანი სამუშაო სტაჟის პენსიონერის პენსია უნდა იყოს 220 ლარი", - აღნიშნა ბაღათურიამ.