ბიძინა ივანიშვილი ზურაბ ჟვანიას მეუღლეს ხვდება. ნინო ქადაგიძეს ივანიშვილის რეზიდენციაში შესვლამდე კომენტარი არ გაუკეთებია.
შეგახსენებთ, რომ ბიძინა ივანიშვილმა პირველ ნოემბერს გამართულ პრესკონფერენციაზე განაცხადა, რომ უახლოეს დღეებში ტრაგიკულად დაღუპული საქართველოს პრემიერ-მინისტრის, ზურაბ ჟვანიას მეუღლესთან, ნინო ქადაგიძესთან შეხვედრას გეგმავს.
"ვაპირებ ზურაბ ჟვანიას მეუღლესთან შეხვედრას ამ დღეებში", - აღნიშნა ივანიშვილმა. ჟურნალისტის კითხვაზე იცის თუ არა მან რაიმე ზურაბ ჟვანიას გარდაცვალებასთან დაკავშირებით, ბიზნესმენს კომენტარი არ გაუკეთებია.
ნინო ქადაგიძემ ივანიშვილთან შეხვედრის სურვილი პრესის საშუალებით გამოთქვა. ყოფილი პრემიერის მეუღლე ამბობს, რომ ბიძინა ივანიშვილი და ზურაბ ჟვანია მეგობრები იყვნენ და მას შეიძლება მისი მეუღლის ბუნდოვანი გარდაცვალების შესახებ რაიმე ინფორმაცია ჰქონდეს.