დღეს, 31 ოქტომბერს, პლანეტის მოსახლეობის რაოდენობამ 7 მილიარდს მიაღწია, 24 ოქტომბერს კი მსოფლიოს ყველა ქვეყანაში ჩაირთო მრიცხველი და დაიწყო 7-მილიარდიანი ნიშნულის ათვლა.
საქართველოს პარლამენტის თავმჯდომარის მოადგილე გიგი წერეთელი სიტყვით გამოვიდა მსოფლიო მოსახლეობის 7-მილიარდიან ნიშნულთან დაკავშირებით ეროვნულ მუზეუმში გამართულ ღონისძიებაზე, რომლის ინიციატორი იყო გაეროს მოსახლეობის ფონდის საქართველოს წარმომადგენლობა.
წერეთელმა აღნიშნა, რომ ეს ფაქტი მოითხოვს მსოფლიოს ყველა ქვეყნის მთავრობის გააქტიურებას, რესურსების მობილიზებას და უფრო ეფექტურ ეკონომიკურ მექანიზმებს, რათა ადამიანები უზრუნვეყოფილნი იყვნენ სათანადო, ღირსეული ცხოვრების პირობებით. სწორედ ამ საერთო მიზნის მიღწევას ემსახურება გაეროს საპროგრამო დოკუმენტი "ათასწლეულის დეკლარაცია" და კონკრეტულად ჩამოყალიბებული "ათასწლეულის განვითარების მიზნები", რომლებიც 2015 წლისთვის შესაბამისი ინდიკატორების მიღწევის შემთხვევაში, მნიშვნელოვნად გააუმჯობესებენ მსოფლიო მოსახლეობის ცხოვრების დონეს. საქართველოს "ათასწლეულის განვითარების მიზნების" საპარლამენტო ჯგუფი სწორედ ამ მიმართულებით გასატარებელ ღონისძიებებს უწევს კოორდინაციას. მან ასევე აღნიშნა გაეროს მოსახლეობის ფონდის დიდი წვლილი საქართველოში რეპორდუქციული ჯანმრთელობის, გენდერული თანასწორობის და მოსახლეობის განვითარების სფეროში მიღწეულ წარმატებებში.
