საქართველოს მთავრობის ამოცანაა, იძულებით გადაადგილებულ პირებს შეუქმნას საშუალება სრული ინტეგრაციისთვის, მათთვის, პირველ რიგში საცხოვრებელი პირობების გაუმჯობესების, მათ მიერ კერძო საკუთრების მოპოვების და დასაქმების გზით. ეს ამოცანა ხორციელდება იმ დათქმით, რომ მათი, როგორც საქართველოს მოქალაქეების, უფლება - დაბრუნდნენ ოკუპირებულ ტერიტორიაზე, ისევე როგორც მათი საკუთრების უფლებები,
შეუქცევადია. ამის შესახებ საქართველოს მთავრობის მიერ შემუშავებულ ათ პუნქტიან გეგმაშია ნათქვამი.
გეგმის თანახმად, სოციალური პოლიტიკის დახვეწის პროცესი განხორციელდება რეკონსტრუირებული საცხოვრებელი ერთეულების დაკანონების გზით, სოფლებში საკარმიდამოს გადაცემის საშუალებით, საცხოვრებლისათვის კომპენსაციების გაცემით, მრავალბინიანი საცხოვრებელი სახლების მშენებლობით.
საქართველოს მთავრობის ინფორმაციით, ამჟამად მიმდინარეობს დამატებით 54 კარკასული შენობისა და 64 კოლექტიური ცენტრის სრული რეაბილიტაცია 3,130 დევნილი ოჯახისათვის. სულ მიმდინარეობს ან დაგეგმილია ახალი საცხოვრებელი მრავალბინიანი სახლების მშენებლობა: ფოთში _ 32 მრავალბინიანი სახლი 1,168 ოჯახისათვის, წყალტუბოში _ 10 მრავალბინიანი სახლი 352 ოჯახისათვის, ბათუმში _ 22 მრავალბინიანი სახლი 608 ოჯახისათვის, ზუგდიდში _ 10 მრავალბინიანი სახლი 320 ოჯახისათვის.
