ხვალ, 29 ოქტომბერს, 17:00 საათზე, დუშეთის კულტურის სახლში წარმოდგენილი იქნება დუშეთის სახალხო თეატრის სპექტაკლი გოდერძი ჩოხელის ნაწარმოებების მიხედვით. ღონისძიება კონფერენციის - "გოდერძი ჩოხელი - შემოქმედება საზღვრების გარეშე" - ფარგლებში ტარდება.
30 ოქტომბერს კი, 13:00 საათზე, გუდამაყარში პოეტების, მწერლებისა და მუსიკალური ანსამბლების მონაწილეობით გოდერძი ჩოხელის ხსოვნის დღე მოეწყობა.
28 ოქტომბერს, თბილისში გაიხსნა ქართველი მწერლის, გოდერძი ჩოხელის შემოქმედებისადმი მიძღვნილი პირველი საერთაშორისო სამეცნიერო კონფერენცია - "გოდერძი ჩოხელი - შემოქმედება საზღვრების გარეშე". ღონისძიება საპატრიარქოს წმიდა ანდრია პირველწოდებულის სახელობის ქართული უნივერსიტეტის, გრიგოლ რობაქიძის უნივერსიტეტისა და ნიუ-იორკში ქართული კულტურის ცენტრის - საერთაშორისო ინკორპორაცია "ამირანის" ორგანიზებით და თბილისის მერიის კულტურის სამსახურის, მცხეთა-მთიანეთის გუბერნიის ადმინისტრაციისა და დუშეთის მუნიციპალიტეტის გამგეობის მხარდაჭერით გაიმართება.
კონფერენცია 28 ოქტომბერს საქართველოს საპატრიარქოს წმ.ანდრია პირველწოდებულის სახელობის ქართულ უნივერსიტეტის საკონფერენციო დარბაზში გაიხსნება.
