ბანკი „ქართუს" იურიდიული სამსახურის განცხადებას ავრცელებს, რომელსაც უცვლელად გთავაზობთ:
"ბოლო დროს განვითარებული მოვლენების გამო ს.ს. „ბანკი ქართუ"-ს კლიენტების მხრიდან მკვეთრად გაიზარდა მოთხოვნა ნაღდ ვალუტაზე, რაც გამოწვეული იყო საბანკო ანგარიშებიდან და განსაკუთრებით ანაბრებიდან თანხების გადინებასთან. ამასთან გასათვალისწინებელია ის გარემოება, რომ ანაბრები ს.ს. „ბანკი ქართუ"-ში უმეტესწილად განთავსებულია უცხოურ ვალუტაში.
ბანკის კლიენტების მოთხოვნის შეუფერხებელი დაკმაყოფილების მიზნით ს.ს. „ბანკი ქართუ"-ს და სს „საქართველოს ბანკი"-ს შორის 2011 წლის 18 ოქტომბერს გენერალური ხელშეკრულების სახაზინო ოპერაციების წარმოების პირობების შესახებ ფარგლებში დაიდო ორი სტანდარტული ბანკნოტური გარიგება.
გარიგებების თანახმად ს.ს. "ბანკი ქართუ"-მ თავის საკორესპონდენტო ანგარიშიდან Deutsche Bank Trust Company Americas-ში (ნიუ-იორკი,აშშ) გადარიცხა 2,000,000 (ორი მილიონი) აშშ დოლარი Citibank International-ში (ნიუ-იორკი,აშშ) გახსნილ ს.ს. „საქართველოს ბანკი"-ს ანგარიშზე, ხოლო 1,000,000 (ერთი მილიონი) ევრო თავისი საკოპესპონდენტო ანგარიშიდან Commerzbank-ში (ფრანქფურტი,გერმანია) გადარიცხვა ამავე ბანკში გახსნილ ს.ს. „საქართველოს ბანკი"-ს ანგარიშზე. ამ ტრანსაქციების სანაცვლოდ ს.ს „ბანკი ქართუ"-ს თავისი სალაროს გამაგრების მიზნით ნაღდი ფულის სახით უნდა მიეღო ს.ს. „საქართველოს ბანკში" 2,000,000 (ორი მილიონი) აშშ დოლარი და 1,000,000 (ერთი მილიონი) ევრო.
2011 წლის 18 ოქტომბერს დაახლოებით 17.15 საათზე სს „საქართველოს ბანკი"-ს სათაო ოფისის ტერიტორიაზე ზემოთხსენებული თანხების ინკასაციის განხორციელების დროს სამართალდამცავების მიერ დაკავებული იყო სს „ბანკი ქართუ"-ს ოთხი მოლარე, ორი ინკასატორი და მათი თანხმლები დაცვის პოლიციის თანამშრომელი. პოლიციელები იყვნენ სამოქალაქო ფორმაში, ზოგი მათგანი კი - ნიღბით, რითაც დაარღვიეს კანონი პოლიციის შესახებ, ასევე საპროცესო წესები დაკავებისა და სხვა უფლება-მოვალეობების თაობაზე. არსებობდა ცეცხლის გახსნის საშიშროება ბანკის ინკასატორების მხრიდან, რადგან შესაძლოა უფორმო პოლიციელები კრიმინალებად ჩაეთვალათ. ეს გამოიწვევდა სისხლისღვრას. ბანკის თანამშრომლები გადაყვანილ იყვნენ ძველი თბილისის სამმართველოს VII განყოფილებაში, საიდანაც მოგვიანებით გამოშვებულ იქნენ ჩვენების მიცემის შემდეგ.
სამართალდამცავების მიერ ჩამორთმეულ იქნა ს.ს. „ბანკი ქართუ"-ს კუთვნილი VOLKSWAGEN-ის ტიპის საინკასაციო ბრონირებული მანქანა სახელმწიფო სანომრე ნიშნით BAT 963 და ბანკის სალაროს გამაგრების მიზნით გადასაზიდი ბანკის კუთვნილი ფულადი სახსრები 2,000,000 (ორი მილიონი) აშშ დოლარისა და 1,000,000 (ერთ მილიონი) ევროს ოდენობით.
შსს-ს ოფიციალური ვებ-საიტზე www.police.ge განთავსებულ ინფორმაციაზე დაყრდნობით საქმე აღძრულია საქართველოს სისხლის სამართლის კოდექსის 194-ე მუხლის მესამე ნაწილით - უკანონო შემოსავლების ლეგალიზაცია (ფულის გათეთრება) განსაკუთრებით დიდი ოდენობით.
ს.ს. „ბანკი ქართუ"-სთვის გაუგებარია, თუ რა საფუძვლით ან რა ნიშნით შეიძლება მიჩნეულ იქნას საბანკო პრაქტიკაში ასე ფართოდ გავრცელებული სალაროს გამაგრების ოპერაციები ფულის გათეთრებად მითუმეტეს, რომ მხოლოდ მიმდინარე წლის განმავლობაში ს.ს. „ბანკი ქართუ"-მ განახორციელა ორასამდე ანალოგიური გარიგება რომელთა საერთო თანხა აღემატება რამდენიმე ათეული მილიონი აშშ დოლარის ექვივალენტს.
ჩვენ მომხდარს ბიძინა ივანიშვილის მიმართ პოლიტიკური ანგარიშსწორების კიდევ ერთ ფაქტად ვაფასებთ".