როგორც "ჯი-ეიჩ-ენისთვის" გახდა ცნობილი, ლეიბორისტული პარტიის საერთაშორისო მდივნის, მეცნიერის, პროფესორ ნესტან კირთაძისთვის მიუღებელია ლეიბორისტების ლიდერ შალვა ნათელაშვილის მიერ ბიზნესმენ ბიძინა ივანიშვილის წინააღმდეგ გაკეთებული განცხადებები.
აღნიშნულ საკითხთან დაკავშირებით, კირთაძესა და ნათელაშვილს შორის შეხვედრა და საუბარი შედგა. კირთაძემ პარტიის ლიდერს განუცხადა, რომ მისი პოზიცია ბიძინა ივანიშვილთან დაკავშირებით იყო აბსოლუტურად მიუღებელი და პოლიტიკურად გაუმართლებელი.
როგორც "ჯი-ეიჩ-ენს" კირთაძემ განუცხადა, შალვა ნათელაშვილის განცხადების ტონალობა, ფორმა, შინაარსი და საერთაშორისო აქცენტები არა მხოლოდ ივანიშვილის წინააღმდეგ იყო მიმართული, არამედ ეს განცხადება ხალხისგან შეფასდა სააკაშვილისა და მისი რეჟიმისადმი ირიბ მხარდაჭერად. მეტიც: ასეთი ტიპის განცხადებები რეჟიმს წაახალისებს, ახალი ენთუზიაზმით გააგრძელოს ღია ტერორი ქვეყანაში.
მისი თქმით, ნათელაშვილის განცხადება მიუღებელი იყო სოციალური და საერთაშორისო აქცენტებითაც.
"ბოდიში მინდა მოვიხადო იმ თანამემამულეების წინაშე, რომელთაც შალვამ ფულის მონები უწოდა. არასწორი აქცენტი გაკეთდა, როდესაც ივანიშვილი შეფასდა, როგორც სოროსი 2 და აშშ-ის პროექტი. ჩვენ ვალდებულნი ვართ, ვეძებოთ და გავამრავლოთ მოკავშირეები და პარტნიორები დასავლეთში ყველა მიმართულებით და არა დავკარგოთ ისინი. სამწუხაროდ, არ მომეცა შესაძლებლობა, შიდაპარტიული დემოკრატიის პრინციპით, ჩემი განსხვავებული მოსაზრებები ხმამაღლა მეთქვა ამომრჩევლებისთვის, ქართული და საერთაშორისო საზოგადოებისთვის. არ მომეცა შესაძლებლობა, აღმესრულებინა ჩემი, როგორც ქართველის მოვალეობა და დამეცვა ბიძინა ივანიშვილის საქართველოს მოქალაქეობა. ასევე არ მომეცა შესაძლებლობა, პრინციპულად დავპირისპირებოდი ხელისუფლებისგან დაწყებულ ღია ტერორს. ამიტომ თავს მოვალედ მივიჩნევ, ჩემი პრინციპული პოზიცია იცოდეს ჩვენმა ხალხმა", - განუცხადა "ჯი-ეიჩ-ენს" კირთაძემ.
"ჯი-ეიჩ-ენის" კითხვაზე, ნიშნავს თუ არა ეს ნათელაშვილისგან გამიჯვნას, კირთაძემ განაცხადა: „დიახ! მე სრულად ვემიჯნები ნათელაშვილისა და სხვა კოლეგების მიერ გაკეთებულ განცხადებებს!"
კირთაძე მიიჩნევს, რომ მიუხედავად იმ პოზიციისა და დამოკიდებულებისა, რაც არსებობდა ლეიბორისტული პარტიის რიგ ლიდერებში ივანიშვილის მიმართ, პარტია და მისი ლიდერი ვალდებულნი იყვნენ, თავიანთი მოქალაქეობრივი და ზნეობრივი პოზიცია დაეფიქსირებინათ სააკაშვილის ხელისუფლების მიერ ივანიშვილისთვის მოქალაქეობის ჩამორთმევისა და მის წინააღმდეგ მიმართული ღია ტერორის გამო.
კირთაძე აცხადებს, რომ გაოგნებული დარჩა ნათელაშვილის განცხადების მოსმენისას, რადგან მისთვის განცხადების შინაარსი ცნობილი და შეთანხმებული არ იყო.
"ვიცი, რომ ეს განცხადება მტკივნეული იქნება, მაგრამ ნამდვილად არ ვაპირებ, რაიმე აუგი ვთქვა ჩემს ყოფილ თანაგუნდელებზე, რომლებთან ერთადაც წლები გავატარე ჩვენი ქვეყნისთვის ურთულეს პერიოდში. ფაქტია, რომ ბოლო დროს ჩვენი შეხედულებები ქვეყნის გადარჩენაზე, ჩვენი ხალხის გამარჯვების შანსსა და შემდგომ გამარჯვებაზე აშკარად არ ემთხვეოდა ერთმანეთს", - განუცხადა "ჯი-ეიჩ-ენს" კირთაძემ.
როგორც კირთაძემ აღნიშნა, იგი ქვეყნაში მიმდინარე პოლიტიკურ პროცესებსა და სამომავლო პოლიტიკური გეგმების შესახებ უახლოეს დღეებში სპეციალურ განცხადებას გააკეთებს.