დღეს, 20 ოქტომბერს, ჟენევაში საქართველოსა და რუსეთს შორის შვეიცარიის შუამავლობით რუსეთის ვაჭრობის მსოფლიო ორგანიზაციაში გაწევრიანების შესახებ მოლაპარაკებათა მორიგი რაუნდი გაიმართება.
მოლაპარაკებათა წინა რაუნდები უშედეგოდ დასრულდა, ვინაიდან რუსეთი უარს აცხადებდა იმ მექანიზმების მიღებაზე, რომლებიც რუსეთ-საქართველოს საზღვრის, აფხაზეთისა და ე.წ. სამხრეთ ოსეთის მონაკვეთებზე "სრულ გამჭირვალობას" უზრუნველყოფდა.
რუსეთის ფედერაცია მხოლოდ იმ ტვირთების მონიტორინგს თანხმდება, რომლებიც, შესაძლოა, რუსეთიდან სეპარატისტული რეგიონების გავლით შევიდეს საქართველოში და არა იმ ტვირთების, რომელთა დანიშნულების საბოლოო ადგილი სეპარატისტული რეგიონების შიგნით მდებარეობს.
რუსული მედიის ინფორმაციით, ვმო-ს სამუშაო ჯგუფის არაფორმალური შეხვედრა 26-27 ოქტომბერს იგეგმება, ხოლო სამუშაო ჯგუფის საბოლოო ფორმალური შეხვედრა 10 ნოემბერს გაიმართება.
