"ბიძინა ივანიშვილის პოლიტიკაში წასვლის შემდეგ ხელისუფლებამ საჩხერეში რეპრესიები დაიწყო", - ამის შესახებ დღეს გამართლ ბრიფინგზე "საქართველოს რესპუბლიკური პარტიის" საჩხერის საკრებულოს წევრმა და ოპოზიციური ფრაქციის თავჯდომარემ ინგა ზამბახიძემ განაცხადა. მისი თქმით, ხელისუფლებამ შეაჩერა ყველა pროექტი, რომელსაც ივანიშვილი აფინანსებს.
"მას შემდეგ, რაც ივანიშვილმა პოლიტიკური განცხადება გააკეთა, ისევე, როგორც მთელ საქართველოში, საჩხერის რაიონში დაიწყო ტერორი და მოსახლეობის დაშინება. განსაკუთრებული ტერორის ქვეშ მოeქცნენ პედაგოგები, რომლებიც აქამდე იღებდნენ სოლიდურ ხელფასს ქველმოქმედისგან. რამდენადაც ჩვენთვის ცნობილია, ადგილობრივი ხელისუფლების მხრიდან იყო დირექტივები სკოლის დირექტორებზე, რომ ყველა პედაგოგმა უარი თქვას "ბინძური ფულის აღებაზე". ტერორი და დაშინება არის მცირე მეწარმეებზედაც. შეწყდა საქველმოქმედო პროექტები საჩხერის რაიონში. შეწყდა ხე-ტყის მიწოდება, რაც აუცილებელი იყო სახლების გადახურვისთვის. ივანიშვილი რაიონის მთელ მოსახლეობას მეტალ-კრამიტის სახურავებით უხურავდა სახლს. ახალგაზრდები არიან აღშფოთებულები. საჩხერის საფეხბურთო კლუბ "ჩიხურას" ივანიშვილი აფინანსებდა. ახლა კი ადგილობრივმა ხელისუფლებამ შეკრიბა კლუბის დამფუძნებლები, რათა აიძულონ ისინი, უარი თქვან ფინანსების მიღებაზე. სწორედ ივანიშვილის დაფინანსების გამო მიაღწია გუნდმა გარკვეულ წარმატებას", - განაცხადა ზამბახიძემ.
მისი თქმით, რაიონის მოსახლეობა არის აღშფოთებული და შეშინებული, რადგან ადგილობრივი ხელისუფლება არაფერს ერიდება.