"საქართველოს გზა" ბიძინა ივანიშვილზე "განხორციელებულ ზეწოლასთან" დაკავშირებით სახალხო დამცველსა და საქართველოში აკრედიტირებულ საელჩოებს მიმართავს. მიმართვის თანახმად, საქართველოს ხელისუფლება აგრძელებს პოლიტიკურ ოპონენტებთან ანგარიშწორებისა და ტერორის ჩვეულ გზას.
"საკმარისია ასპარეზზე გამოჩნდეს ძალა, რომელსაც შეწევს უნარი სერიოზული წინააღმდეგობა გაუწიოს დღევანდელ რეჟიმს, მყისიერად იწყებს მოქმედებას ხელისუფლების პროპაგანდისტული-სადამსჯელო მანქანა. ცდილობს რა, კანონის დარღვევით, ტერორით, დაშინებით, ცილისწამებით მოახდინოს შექმნილი საფრთხის განეიტრალება, რეჟიმი კანონგარეშე აყენებს საკუთარ თავს და მოვლენები სამართლებრივი ჩარჩოების მიღმა გაჰყავს. ხელისუფლების მიზანია, ძალადობით გამოიწვიოს ადეკვატური რეაქცია, მოახდინოს პოლიტიკური ოპონენტის დისკრედიტაცია და ბრალი დასდოს მას ქვეყნისთვის ძირგამომთხრელ საქმიანობაში. დემოკრატიულობის ნიღაბს ამოფარებული ხელისუფლება ყოველ ნაბიჯზე არღვევს ადამიანის უფლებებს და ქვეყანას მძიმე არჩევანის წინაშე აყენებს", - აღნიშნულია პარტიის მიერ გავრცელებულ განცხადებაში.
"საქართველოს გზა" მოუწოდებს სახალხო დამცველსა და საქართველოში აკრედიტირებულ საელჩოებს გამოიყენონ ხელისუფლებაზე ზემოქმედების მათ ხელთ არსებული ყველა საშუალება და ბერკეტი, რათა დაცული იქნას ადამიანის უფლება, იყოს ქვეყნის მოქალაქე და მიიღოს არჩევნებში მონაწილეობა.