მთავრობა ბაზრობებზე ვაჭრობის რეგულირებას განაგრძობს. როგორც სააგენტო "ჯი-ეიჩ-ენთან" საუბრისას მთავრობის საპარლამენტო მდივანმა გია ხუროშვილმა განმარტა, უკვე მზადაა "საგადასახადო კოდექსში" შესატანი ცვლილებები. ცვლილებების მიხედვით, სპეციალური სავაჭრო ზონები შეიქმნება, სადაც ვაჭრობა ცენტრალიზებულად მოხდება, მეწარმეები საგადასახადო დოკუმენტაციის წარმოებისგან განთავისუფლდებიან და საგადასახადოსთან ურთიერთობა მათ ნაცვლად უკვე სავაჭრო ზონის მეპატრონეს ექნება.
"საქართველოს მთავრობა ე.წ. ბაზრობის თემის მოგვარებას იწყებს. გვესმის იმ ადამიანების, რომლებიც დღეს ბაზრობაზე არიან დასაქმებულნი და ეწევიან ვაჭრობას. მათთვის საგადასახადო დოკუმენტების წარმოება საკმაოდ რთულია. აქედან გამომდინარე, მთავრობა სთავაზობს მეწარმეებს სპეციალური ზონების შექმნას, სადაც ადმინისტრირების პასუხისმგებლობა მთლიანად ბაზრობის მომწყობზე გადავა და მოქალქეები განთავისუფლდებიან ყოველგვარი დოკუმენტების წარმოებისგან", - აღნიშნა ხუროშვილმა.
მთავრობის საპარლამენტო მდივნის თქმით, სპეციალური სავაჭრო ზონის სტატუსი მიენიჭება იურიდიულ პირს, რომელიც საქართველოში ვაჭრობის ორგანიზებას საკუთარი ან საქართველოს მთავრობის ინიციატივით ეწევა.
კანონპროექტის თანახმად, ვაჭრობის ორგანიზება არის პირის, ან პირთა ჯგუფის საკუთრებაში / მფლობელობაში არსებული ბაზრის, ან შენობა-ნაგებობის ტერიტორიაზე განლაგებული სავაჭრო ადგილები და სავაჭრო ადგილების გაქირავება.
ხუროშვილი აცხადებს, რომ ვაჭრობის თემის დარეგულირება მოხდება შემდეგნაირად: მოხდება კონკრეტული სავაჭრო ტერიტორიის შემოსაზღვრა, სადაც სავაჭრო დახლები განთავსდება. იმავდროულად, ბაზრობის ორგანიზატორის მიერ მოხდება ბაზრობის ტერიტორიის დაყოფა გარკვეულ მოლებად, სადაც ერთგვაროვანი საქონელი გაიყიდება.
"ბაზრობის მომწყობი ასევე ვალდებული იქნება, მოახდინოს საქონლის დამცავი საშუალებით ნიშანდება და სპეციალურ სავაჭრო ზონაში რეალიზებულ საქონელზე ანგარიშსწორება მოახდინოს ცენტრალიზებული სალარო აპარატების საშუალებით, ანუ უშუალოდ მეწარმეს ფულთან შეხება არ ექნება. სუბიექტის მიერ შემოტანილი პროდუქცია განთავსება საწყობში, სადაც განხორციელდება პროდუქციის დანომვრა შესაბამისი შტრიხკოდით და როდესაც მომხმარებელი ამა თუ იმ პროდუქციას შეიძენს, ის თანხას ცენტრალიზებულ სალაროსთან გადაიხდის", - აცხადებს მთავრობის საპარლამენტო მდივანი.
კანონპროექტის თანახმად, დღის ბოლოს თვითონ ბაზრობის ორგანიზატორი მოახდენს რეალიზებული პროდუქციის თანხის 3 %-ის დაკავებას, ხოლო 97 %-ს დაუბრუნდება მოვაჭრეს.
იმავდროულად, მეწარმე განთავისუფლდება მოგების გადასახადისაგან, მას არ ექნება დღგ-ის დეკლარირების ვალდებულება და შესაბამისად მოვაჭრეები განთავისუფლდებიან დღგ-ის გადასახადისაგან. ასევე მოვაჭრე განთავისუფლდება დამატებითი დოკუმენტების წარმოებისგან.
მთავრობის საპარლამენტო მდივანი აცხადებს, რომ ბაზრობები ახალ რეგულაციაზე ეტაპობრივად გადავლენ.
"დღეს მდგომარეობით, რომელი ბაზრობებიც იქნებიან მზად ამ ტიპის რეგულაციაზე გადასასვლელად, ბუნებრივია, ისინი გადავლენ, ხოლო სხვა ტიპის ბაზრობებისთვის განისაზღვრება ვადა", - აცხადებს ხუროშვილი.
ხუროშვილის თქმით, ბაზრობებს ახალ რეგულაციებზე გადასასვლელად ექნებათ გონივრული დრო და ის კანონმდებლობით გაიწერება. აღნიშნული თარიღი კი "საგადასახადო კოდექსში" პროექტის მესამე მოსმენამდე დაზუსტდება.