მიტაცებული მიწის ნაკვეთი და გარდაცვლილი მეუღლე - ბიძინა ივანაშვილის უცნაური სრა-სასახლე, სოლოლაკში, შესაძლოა დაანგრიონ, - ამ ინფორმაციას "პრესა.ჯი" ავრცელებს. გამოცემის ინფორმაციით, იმ შემთხვევაში, თუ დამტკიცდა, რომ ივანაშვილმა, მიწის ნაკვეთი, რომელზეც მისი სოლოლაკის „ხუხულაა" დამაგრებული, მიიტაცა, გამორიცხული არაა, რომ რუსეთში გამდიდრებული ოლიგარქი თბილისული „ჭერის" გარეშე დარჩეს... მის წარმომადგენლებს კი „ვირის აბანო" ახეხინონ...
„პრესა.ჯი" წერს, რომ გამოცემამ სენსაციური ინფორმაცია მოიპოვა. "მოქალაქე აცხადებს, რომ მას, ივანაშვილის კომპანიამ კუთვნილი მიწის ნაკვეთი წაართვა, რის გამოც მისი მეუღლე ნერვიულობისგან გარდაიცვალა... "საქმე ეხება ივანაშვილის უცნაურ სრა-სასახლეს სოლოლაკში, რომელიც ქალბატონ მარინა იაკობაშვილის (გოგილაშვილის) განცხადებით, სწორედ მის კუთვნილ ტერიტორიაზეა აშენებული".
„მიწის ნაკვეთი, რომელიც ბიძინა ივანაშვილის კომპანიამ წაგვართვა ტექ-ბიუროში ისევ ჩემ მეუღლეზეა გაფორმებული. ამ ტერიტორიაზე იყო სასაუზმე „სოლოლაკი", - აცხადებს ქალბატონი მარინა.
გამოცემასთან საუბარში მარინა იაკობაშვილი ჰყვება, რომ ეს ამბავი 1998 წელს მოხდა. "როცა ამ საკითხზე სასამართლო პროცესი დავიწყეთ, ყადაღა დავადეთ იმ ტერიტორიას და შიდა მშენებლობა ავკრძალეთ. მაშინ, „ქართუ ბანკმა" გასცა საბანკო გარანტია. ამის შემდეგ კი, მოსამართლემ მოხსნა ყადაღა. მაშინ მერიაც მხარე იყო. მერიამ ივანაშვილის კომპანიას - „ინტერ სერვისს" უთხრა, რომ შენი მოვალეობა და ვალდებულება იყო შესასრულებელი და უკანონოდ მოიქეციო".
იაკობაშვილის თქმით, "ინტერ სერვისი" ივანაშვილის კომპანიაა. მისივე თქმით, მის ოჯახს სულ 415 კვადრატი ეკუთვნის.
"მაშინდელი საბაზრო ღირებულება დაფიქსირებული იყო და 12 წლის შემდეგ ყველაფერი გაძვირდა. მე თანხაც არ დამისახელებია არასდროს, ვამბობდი, რომ ივანაშვილმა დაასახელოს თანხა, შეაფასონ და ისე გადამიხადოს-მეთქი. თუმცა, ამ დრომდე არავის არაფერი მოუცია ჩემთვის. ერთი კი დანამდვილებით ვიცი, რომ ჩემი მეუღლე ამ საქმეს შეეწირა. არ ჰყიდდა ამ ნაკვეთს. ივანაშვილის ხალხთან შეხვედრაზე იყო, იქიდან განერვიულებული მოვიდა და ძილში გარდაიცვალა 36 წლის კაცი, სიცოცხლე მოუსწრაფეს", - აცხადებს იაკობაშვილი.
მისი თქმით, მისი მეუღლე იყო გიორგი გოგილაშვილი. "ჩემი მეუღლე „სამადლოს" დირექტორი იყო. ამავე დროს ოთხი ობიექტი ჰქონდა პრივატიზირებული და ერთ-ერთი იყო სასაუზმე „სოლოლაკი""