რუსეთის იმპერიის მიერ ჩერქეზი ხალხის მიმართ განხორციელებული გენოციდის მსხვერპლთა ხსოვნისადმი მიძღვნილი მემორიალის ესკიზური პროექტის შესარჩევი კონკურსის კომისიის წევრები და დიასპორის საკითხებში საქართველოს სახელმწიფო მინისტრი, მირზა (პაპუნა) დავითაია დღეს იუსტიციის სამინისტროს საქართველოს ეროვნულ არქივს ეწვივნენ.
ეროვნული არქივის გენერალურ დირექტორთან თეონა იაშვილთან გამართულ შეხვედრაზე საუბარი შეეხო იმ დოკუმენტებს, რომელიც ჩერქეზთა გენოციდთან დაკავშირებით ეროვნულ არქივშია დაცული. სტუმრები გაეცნენ როგორც წერილობით, ისე ფოტოდოკუმენტებს.
როგორც შეხვედრაზე სტუმრებმა აღნიშნეს, საქართველოს ეროვნულ არქივში დაცული უნიკალური მასალები რუსეთის მხრიდან ჩერქეზთა მიმართ განხორციელებული გენოციდის ერთ-ერთი დასტურია და ქართული მხარის თანამშრომლობა ამ საკითხის კვლევაში განსაკუთრებით დასაფასებელია.
