ბიძინა ივანიშვილი დღეს გავრცელებულ განცხადებაში იმ პოლიტიკურ პარტიებზეც საუბრობს, რომლებთანაც თანამშრომლობას აპირებს და მათ შორის "რესპუბლიკურ პარტიასა" და "თავისუფალ დემოკრატებს" გამოყოფს.
"პირველ რიგში, მინდა ვახსენო "რესპუბლიკური პარტია", როგორც ერთ-ერთი ყველაზე გამოცდილი და მრავალ ბატალიებში გამობრძმედილი პარტიაა პოლიტიკური ბიოგრაფიის დიდი სტაჟით, შესაშური ინტელექტუალური რესურსით და ნათლად გამოკვეთილი პოლიტიკური ლიდერებით", _ აცხადებს ივანიშვილი და ასევე აღნიშნავს, რომ თანამედროვე ყაიდის საინტერესო და იმედისმომცემ პოლიტიკურ ორგანიზაციად მიიჩნევს პარტია "თავისუფალ დემოკრატებს", პარტიის ლიდერის, ირაკლი ალასანიას შესახებ, კი აცხადებს, რომ მას " ქართულ სინამდვილეში ერთ-ერთი წონადი და ანგარიშგასაწევი ფიგურას" უწოდებს.
"რესპუბლიკელებისგან განსხვავებით, ირაკლი ალასანიასთან და მის პარტიასთან შეკითხვები არ მაქვს", _ აღნიშნავს ივანიშვილი.
ბიზნესმები ასევე აცხადებს, რომ გავრცელებულ მიმართვაში ყველა იმ პოლიტიკოსს და პოლიტიკურ ორგანიზაციას ვერ ჩამოთვლის, ვისთანაც თანამშრომლობას აპირებს.
"უახლოეს ხანებში დრო ყველაფერს თავის ადგილას დაალაგებს და ჩვენი მომავალი პარტნიორების სიაც უფრო დაზუსტდება და დაკონკრეტდება", _ აცხადებს ბიზნესმენი და ხაზგასმით აღნიშნავს, რომ დიდი სიამოვნებით ითანამშრომლებდა "რესპუბლიკურ პარტიასთან".
"რესპუბლიკურ პარტიასთან, მართლაც, დიდი სიამოვნებით ვითანამშრომლებდი, მაგრამ ჩემდა გასაკვირად, ჩემი განცხადების შემდეგ, `რესპუბლიკური პარტიის~ რამდენიმე წევრმა ჩემს მიმართ ძალზე აგრესიული კომენტარები გააკეთა.
"რესპუბლიკური პარტიის" ერთ-ერთ დამფუძნებელს, ლევან ბერძენიშვილს მინდა, ვკითხო:
იმ დროს, როდესაც ხელისუფლებამ „ალია-ჰოლდინგის" საშუალებით შემოგვიტია და ლაფის სროლა დაგვიწყო, ლევან ბერძენიშვილმა ორჭოფული პოზიცია დაიკავა და მრავალმნიშვნელოვანი ტონით განაცხადა, მე ვიცი, საიდან იშოვა ფული ივანიშვილმა და არ ამალაპარაკოთ ახლაო.
ჩვენ ამას მაშინვე გამოვეხმაურეთ და განმარტება მოგთხოვეთ, მაგრამ პასუხს თავი აარიდეთ.
თუ თქვენ, მართლაც, იცით კონკრეტული რამ, კეთილი, ინებეთ და ღიად, საჯაროდ მითხარით, თუ არადა, ამ არაფრისმთქმელ ნართაულებს თავი დაანებეთ, ბატონო ლევან!", - მიმართავს ბიძინა ივანიშვილი ლევან ბერძენიშვილს.