"ურჩიე სააკაშვილს, რომ დროზე გადადგეს! მე მისთვის არასოდეს არ მიმიცია ცუდი რჩევა, არც მისთვის, არც შენთვის", _ აღნიშნავს ივანიშვილი თავის განცხადებაში საქართველოს შს მინისტრის ვანო მერაბიშვილისადმი მიმართვაში.
"კიდევ ერთი რჩევა მინდა მოგცე: ურჩიე სააკაშვილს, რომ დროზე გადადგეს!
სააკაშვილი დაიღალა, გამოიფიტა და ქვეყანაც და საკუთარ თავსაც უფსკრულისკენ მიაქანებს, შენ და შენი მასწავლებელი ადეიშვილი კი, მას დათვურ სამსახურს უწევთ და ძალაუფლებას უნარჩუნებთ.
ეს არ არის გამოსავალი, ეს არ შეიძლება მარადიულად გაგრძელდეს და ასე, ძალისმიერი მეთოდებით ძალაუფლების შენარჩუნების მცდელობა ერთ საბედისწერო დღეს შეიძლება დიდი კატასტროფით დამთავრდეს", _ აცხადებს ბიზნესმენი და კვლავ აღნიშნავს:
"ურჩიე სააკაშვილს, რომ გადადგეს! ეს არის ერთადერთი შანსი, რომ მას საკუთარ ქვეყანაში ცხოვრების საშუალება მიეცეს.
თუ სააკაშვილი შენს რჩევას ყურად არ იღებს, მაშინ შენ თვითონ გადადექი, რადგან შენთვისაც ეს ყველაზე საუკეთესო გამოსავალია და ამით შენ დარჩები საქართველოში საპატივცემულო და ღირსეულ ადამიანად", _ დასძენს ბიძინა ივანიშვილი.
