ბიზნესმენ ბიძინა ივანიშვილის მტკიცებით, მის რუსულ პოლიტიკასთან კავშირის დამადასტურებელ ერთ ფაქტსაც ვერავიბ დაუსახელებს. როგორც ბიზნესმენის მიერ დღეს გავრცელებულ მიმართვაშიია აღნიშნული, "მიუხედავად იმისა, რომ საქართველოს ხელისუფლება და მის მიერ მართული საინფორმაციო საშუალებები ჯიუტად ცდილობენ რუსულ პოლიტიკასთან მიმაბან და ლამის რუსეთის აგენტად გამომაცხადონ, ვერავინ დამისახელებს ამის დამადასტურებელ თუნდაც ერთ ფაქტს, რადგან ასეთი რამ ბუნებაში არ არსებობს".
ივანიშვილი აღნიშნავს, რომ ცხრა წელია რუსეთში არ ყოფილვარ და ამ ხნის განმავლობაში არ ყოფილა არც ერთი ზარი მის ტელეფონზე რუსეთის პოლიტიკური წრეებიდან და რუს პოლიტიკოსებთან არც ერთი შეხვედრა არ ჰქონია.
"საქართველოს ხელისუფლებას ამის გადამოწმება არ გაუჭირდება, თუმცა მათ ამის გადამოწმებაც არ სჭირდებათ _ მათ ისედაც შესანიშნავად იციან, რომ არანაირი კავშირი არ მქონია და არ მაქვს რუსულ პოლიტიკასთან. ხელისუფლების მიერ შეთითხნილ ბინძურ ჭორებზე და აბსურდულ ბრალდებებზე თავის მართლებას არ ვაპირებ, ვიტყვი მხოლოდ ერთს _ საქმე, რომელსაც მე წლების განმავლობაში ვაკეთებ საქართველოში, თუ სინდისის ნატამალი აქვს, როგორ შეიძლება რუსეთის პოლიტიკურ ინტერესებს დაუკავშიროს ვინმემ? სად არის აქ ელემენტარული ლოგიკა? საქმემან შენმან გამოგაჩინოსო, ნათქვამია", - ნათქვამია მიმართვაში.
