"არ მინახავს სხვა სპექტაკლები, მიხარია ფესტივალი, რომელიც სხვადასხვა რეჟისორის ნამუშევრებს უყრის თავს. ჩემი სპექტაკლი კი თავად მაყურებელმა შეაფასოს", - განუცხადა "ჯი-ეიჩ-ენს" ჩხეიძემ.

ფესტივალზე თითქმის ყველა წარმოდგენილ სპექტაკლს ესწრებოდა მსახიობი ნიკა თავაძე. მისი თქმით, ყველა ნაჩვენები სპექტაკლი დაჩრდილა ოლეგ ბასილაშვილის და ალისა ფრეინდლიხის სინთეზმა თემურ ჩხეიძის რეჟისურით.

"ეს ის შემთხვევაა, როდესაც, შეიძლება ითქვას, რომ ჩემი პროფესია უმაღლეს დონეზეა აყვანილი. ამ სპექტაკლში დიდი სინთეზის ზეიმს ხედავ, აქ ყველა ვირტუოზია, მაღალი ხარისხის პროდუქციაა, უდიდესი პატივისცემაა მაყურებლის მიმართ. როდესაც ადამიანი მოგყავს თეატრში, მაყურებელმა ნიჭისგან დადებით ემოციური მუხტი უნდა მიიღოს. ეს ერთეულების ხვედრია. ვფიქრობ, რომ ფესტივალზე ასეთი დონის არც ერთი სპექტაკლი არ იყო წარმოდგენილი. ასეთი დონის მსახიობები, ასეთ რეჟისურით, მსოფლიოში რთული საპოვნელია. თუ მე დამეჯერება, როგორც ამ პროფესიის ადამიანს, შეიძლება ითქვას, რომ ისინი მსოფლიო საუკეთესო 20-ში შედიან", - განუცხადა "ჯი-ეიჩ-ენს" მსახიობმა ნიკა თავაძემ.

"ეს არის ნამდვილი თეატრი, ნამდვილი გარდასახვაა, ეს არის ჩხეიძის დიდი ოსტატობის შედეგი. უმაღლესი რანგის მსახიობები თამაშობენ. ასევე, შეიძლება ითქვას ნაწარმოებზე, რომელიც ყველგან უნდა დაიდგას. ფესტივალის ძალიან ცოტა სპექტაკლი ვნახე, მაგრამ გეტყვით, რომ ნანახებს შორის "ბიძიას სიზმარი" ყველაფრით გამოირჩევა", - აღნიშნა "ჯი-ეიჩ-ენთან" გოგი ქავთარაძემ.

შეგახსენებთ, რომ რუსთაველის თეატრში რეჟისორ თემურ ჩხეიძის სპექტაკლის "ბიძიას სიზმარი" პრემიერა რუსთაველის თეატრში გაიმართა. მასში გიორგი ტოვსტონოგოვის სახელობის თეატრის მსახიობები მონაწილეობდნენ.

ოლეგ ბასილაშვილმა და ალისა ფრეინდლიხმა რუსთაველის თეატრის სცენაზე ორმოქმედებიან წარმოდგენაში ქართველ მაყურებელს დიდი ემოცია დაუტოვეს. სპექტაკლის დასრულების შემდეგ, ოლეგ ბასილაშვილს თეატრის ხელმძღვანელმა, ზაალ ჩიქობავამ, საპატიო თბილისელის წოდება მიანიჭა.
შეგახსენებთ, რომ დოსტოევსკის პიესის მიხედვით შექმნილი სპექტაკლის ჩვენება თბილისის საერთაშორისო თეატრალური ფესტივალის ფარგლებში მოეწყო.