დღეს, 10 ოქტომბერს, 13:00 საათზე, ივანე ჯავახიშვილის სახელობის თბილისის სახელმწიფო უნივერსიტეტის ევროპული კვლევების ინსტიტუტში პროექტის „საქართველოს პარლამენტის ევროპასთან ინტეგრაციის კომიტეტის გაძლიერება" პრეზენტაცია გაიმართება.
პროექტი თსუ ევროპული კვლევების ინსტიტუტისა და საქართველოს პარლამენტის ევროპასთან ინტეგრაციის კომიტეტის ექსპერტული რესურსის გამოყენებით და ფრიდრიხ ებერტის ფონდის სამხრეთ კავკასიის საკოორდინაციო ბიუროს მხარდაჭერით ხორციელდება.
პროექტის მიზანია ევროპასთან ინტეგრაციის სფეროში მხარეებს შორის თანამშრომლობის განმტკიცება და ერთობლივი სამომავლო პროექტების შემუშავება. საწყისი ეტაპისთვის განსაზღვრულია იმ კანონპროექტებზე მუშაობა და ექსპერტული ანალიზის მომზადება, რომელიც უკავშირდება ევროკავშირის მიერ საქართველოსთვის მომზადებულ რეკომენდაციებს ღრმა და ყოვლისმომცველი თავისუფალი ვაჭრობის შესახებ შეთანხმებაზე მოლაპარაკებების დასაწყებად.
პრეზენტაციას თბილისის სახელმწიფო უნივერსიტეტის რექტორი ალექსანდრე კვიტაშვილი და საქართველოს პარლამენტის ევროპასთან ინტეგრაციის კომიტეტის თავმჯდომარე დავით დარჩიაშვილი დაესწრებიან.
