ლევილის მამული საქართველოს დაახლოებით ერთ წელიწადში ოფიციალურად გადმოეცემა. როგორც დღეს მთავრობის სხდომის დაწყებამდე, დიასპორის საკითხებში სახელმწიფო მინისტრმა პაპუნა (მირზა) დავითაიამ განაცხადა, ლევილის მამულის გადმოსაცემად შეთანხმება უკვე მიღწეულია და ამ ეტაპზე მხოლოდ ბიუროკრატიული საკითხების შეთანხმება მიმდინარეობს.
ამას გარდა, დავითაიამ საფრანგეთის პრეზიდენტის საქართველოში ვიზიტს მნიშვნელოვანი უწოდა და აღნიშნა, რომ ლევილის მამულის გადმოცემას ნიკოლა სარკოზიმ კიდევ ერთხელ გაუსვა ხაზი.
"საფრანგეთის პრეზიდენტის ვიზიტი იყო დადებითი და ის მოლოდინი რაც გვქონდა ყველა საკითხში გამართლდა. ლევილის თემასთან დაკავშირებით, მაისში, საფრანგეთში, ძირითად პრინციპებზე ქართულ დიასპორასთან შევთანხმდით, ეს ის პრინციპებია რომლის მიხედვითაც შემდგომში ლევილის მამული იმოქმედებს. ამ მიმართულებით კი თავად საფრანგეთის პრეზიდენტის მხარდაჭერა მნიშვნელოვანი იყო.
ლევილი იქნება ევროპაში ერთ-ერთი უმნიშვნელოვანესი ქართული ცენტრი სადაც განთავსდება კულტურული, სამეცნიერო და საგანმანათლებლო დანიშნულების ობიექტები. ის იქნება ასევე პოლიტიკური მნიშვნელობის ცენტრი რომნელიც მიუთითებს მთელს მსოფლიოს, რომ დემოკრატიული რესპუბლიკა სსრკ-ს დანგრევის შედეგად არ შექმნილა და რომ ჩვენ გაცილებით დიდი ტრადიცია გვაქვს"- აღნიშნა დავითაიამ.
შეგახსენებთ, რომ 6 ოქტომბერს, ნიკოლა სარკოზიმ თავისუფლების მოედანზე ქართველი ხალხისამი მიძღვილ გამოსვლაში განაცხადა, რომ " საფრანგეთში საქართველოს თვითმყოფადობისა და დამოუკიდებლობის ძლიერი სურვილის შენარჩუნება მოხერხდა.
ზუსტად საფრანგეთის მიწაზე, ლევილ-სიურ-ორჟში განისვენებს მრავალი დიდი ქართველი, რომლებიც ნოე ჟორდანიასა და ნოე რამიშვილის მსგავსად, თავისუფალ საქართველოზე ოცნებობდნენ.
მე სრულიად ვუჭერ მხარს ქართული კულტურის ცენტრის გახსნის პროექტს ამ ფრანგულ სოფელში, რომელიც ყველა ქართველისათვის მოგონებების ადგილი და თქვენი დამოუკიდებლობისათვის ბრძოლის სიმბოლოდ იქცა.
საქართველოსა და საფრანგეთს შორის ბრძოლის ველებზეც დამყარდა სისხლით ნათესაური კავშირები".
