2008 წლიდან აფხაზეთის უსაფრთხოება 100 %-ით გარანტირებულია. ეს განცხადება დღეს აფხაზ სეპარატისტთა ლიდერმა ალექსანდრე ანქვაბმა რუსულ მედიასთან საუბარში გააკეთა. მისი თქმით, ეს სეპარატისტებს საშუალებას აძლევს სერიოზული ყურადღება დაუთმონ ე.წ. შიდა საკითხებს.
"ეს საშუალებას გვაძლევს ფული თავდაცვაზე არ ვხარჯოთ, დარწმუნებულნი ვართ ხვალინდელ დღეში და იმაში, რომ ამ სიძნელეებს გადავლახავთ. აქ კი რუსეთის დახმარება კონკრეტულია და იგი რუბლებში გამოიხატება - ეს არის დახმარება ჩვენი პენსიონერებისთვის, მოხუცებისთვის და ჰუმანიტარული დახმარება", _ აცხადებს ანქვაბი.
მისი თქმით, აფხაზეთი დღეს მისი საზღვრების უსაფრთხოებაშია დარწმუნებული და ამ საკითხთან დაკავშირებით, რუსეთის "ეფ-ეს-ბესთან" და რუსეთის თავდაცვის სამინისტროსთან აქტიურად თანამშრომლობს.
