რუსეთის პრეზიდენტმა დიმიტრი მედვედევმა აფხაზ სეპარატისტთა გარდაცვლილი ლიდერი სერგეი ბაღაფში სიკვდილის შემდეგ მამაცობის ორდენით დააჯილდოვა. ინფორმაციას ამის შესახებ რუსული მედია ავრცელებს და აღნიშნავს, რომ შესაბამისი განკარგულება რუსეთის პრეზიდენტმა უკვე გამოსცა.
ეს ჯილდო სერგეი ბაღაფშს ენიჭება "მამაცობისა და თავგანწირვისათვის, რომელიც მან კავკასიის რეგიონში მდგომარეობის სტაბილურობის პრობლემის გადაწყვეტისას გამოავლინა", _ ნათქვამია დიმიტრი მედვედევის მიერ ხელმოწერილ განკარგულებაში, რომელიც 2011 წლის 30 სექტემბრით თარიღდება.
შეგახსენებთ, რომ აფხაზ სეპარატისტთა ლიდერი სერგეი ბაღაფში აფხაზეთს 2005 წლიდან "ხელმძღვანელობდა". იგი მიმდინარე წლის 29 მაისს 63 წლის ასაკში მოსკოვში სიმსივნის დიაგნოზით გარდაიცვალა.
