ქართულ-უნგრული ურთიერთობის გაღრმავება საქართველოს ევროპულ სტრუქტურებში ინტეგრაციის საწინდარი იქნება. ამის შესახებ უნგრეთში ვიზიტისას საქართველოს შინაგან საქმეთა მინისტრმა ივანე მერაბიშვილმა განაცხადა.
"უნგრეთი ერთ-ერთ მოწინავედ მიიჩნევა საქართველოსთვის, ევროინტეგრაციასთან მიმართებაში. საგულისხმოა, რომ უნგრეთის შს მინისტრის ვიზიტი დაიგეგმა საქართველოში. უახლოეს თვეებში იგეგმება პრემიერის ვიზიტიც, რაც ხელს შეუწყობს ქართულ-უნგრული ურთიერთობის სერიოზულ გაღრმავებას. ეს კი საბოლოო ჯამში იქნება საწინდარი საქართველოს ინტეგრაციისთვის ევროპულ სტრუქტურებში", - განაცხადა მერაბიშვილმა.
შეგახსენებთ, რომ მიმდინარე წლის 3-4 ოქტომბერს საქართველოს შინაგან საქმეთა მინისტრი ივანე მერაბიშვილი ოფიციალური ვიზიტით იმყოფებოდა უნგრეთში, სადაც შეხვედრები გამართა უნგრეთის შინაგან საქმეთა მინისტრ შანდორ პინტერთან და პოლიციის სხვა მაღალჩინოსნებთან.
