თბილისში, ხვალ, 5 ოქტომბერს, საზღვრის ერთიანი მართვის სამხრეთ კავკასიური პროგრამის მრჩეველთა საბჭო შეიკრიბება.
შეხვედრის მიზანია 2010 წლიდან დღემდე შესრულებული სამუშაოს განხილვა და პროგრამის სამივე წარმომადგენლობის - აზერბაიჯანის, საქართველოსა და სომხეთის ოფისების ანგარიშების მოსმენა.
შეხვედრას დაესწრებიან ევროკავშირის, ამერიკის შეერთებული შტატებისა და ევროკავშირის წევრი სახელმწიფოების საელჩოების, გაეროს განვითარების პროგრამის (UNDP) და მიგრაციის პოლიტიკის საკითხებში საერთაშორისო ცენტრის (ICMPD) წარმომადგენლები.
შეხვედრა 5 ოქტომბერს, 10:00 საათზე, სასტუმროში „ამბასადორში" გაიმართება.
შეგახსენებთ, რომ ევროკავშირის მიერ დაფინანსებული პროგრამა ხელს უწყობს აზერბაიჯანის, საქართველოსა და სომხეთის მთავრობებს დანერგონ საზღვრის მართვის ერთიანი სისტემა სამხრეთ კავკასიაში.
საზღვრის ერთიანი მართვა უზრუნველყოფს მოქალაქეებისა და ტვირთების შეუფერხებელ გადაადგილებას უსაფრთხო და დაცული საზღვრების პირობებში. ამ მექანიზმის უპირატესობის წარმოჩენის მიზნით SCIBM პროგრამა მუშაობს უშუალოდ გამშვებ პუნქტებთან და საპილოტო პროექტებს განახორციელებს. პროგრამა მჭიდროდ თანამშრომლoბს შესაბამის უწყებებთან სამივე ქვეყანაში და ხელს უწყობს კანონმდებლობისა და პროცედურების დახვეწას.
ინიციატივას, რომლის ღირებულება 6.3 მილიონ ევროს აღემატება, განახორციელებს გაეროს განვითარების პროგრამა (UNDP) მიგრაციის პოლიტიკის საკითხებში საერთაშორისო ცენტრთან (ICMPD) და ევროკავშირის წევრი სახელმწიფოების კონსორციუმთან (ლატვია, ესტონეთი, ლიტვა, საფრანგეთი, ჩეხეთის რესპუბლიკა და პოლონეთი) თანამშრომლობით.