ბათუმის ილია ჭავჭავაძის სახელობის სახელმწიფო დრამატული თეატრი ახალ სპექტაკლს მატეი ვიშნეკის „გვესაჭიროება მოხუცი კლოუნი" რუსთაველის თეატრში 2 -3 ოქტომბერს, 20 საათზე წარადგენს.
პიესის ქართული თარგმანი თინათინ ღარიბაშვილს ეკუთვნის. სპექტაკლში სულ სამი მსახიობი მონაწილეობს. ბათუმის თეატრის არტისტებს ტიტე კომახიძეს (ფილიპო) და მამუკა მანჯგალაძეს (ნიკოლო) პარტნიორობას ცნობილი მსახიობი, კინომსახიობთა თეატრის არტისტი რამაზ იოსელიანი უწევს.
აღსანიშნავია, რომ ეს პიესა არის ამ დრამატურგის პირველი ნაწარმოები, რომელიც ქართულ სცენაზე განხორციელდა. ქართულ სცენაზე კი მის პიესა პირველად გიორგი თავაძემ ბათუმის თეატრში სახელწოდებით „გვესაჭიროება მოხუცი კლოუნი" დადგა.
სპექტაკლი მოხუცი კლოუნების ისტორიებს მოგვითხრობს, რომლებიც საგანგებოდ გამოცხადებულ კასტინგზე შეხვდებიან ერთმანეთს. ისინი იხსენებენ წარსულ წლებს და გაითამაშებენ უამრავ საცირკო ნომერს.
შეგახსენებთ, რომ ბათუმის თეატრი ამ სპექტაკლით მონაწილეობას იღებს თბილისის საერთაშორისო თეატრალური ფესტივალის ქართული „შჰოწ ჩასე" პროგრამაში.
რუსთაველის თეატრში წარმოდგენების გამართვისთანავე ბათუმის თეატრის დასი საგასტროლოდ თელავში მიემგზავრება, სადაც 4 ოქტომბერს თელავის სახელმწიფო დრამატული თეატრის სცენაზე საგასტროლო წარმოდგენას გამართავს. ბათუმის თეატრი 133 წლის მანძილზე პირველად ეწვევა თელავის თეატრს.