საქართველოს რეგიონებში სიძულვილის ენის, სიძულვილის დანაშაულისა და მათთან დაკავშირებული ქართული რეალობის შესახებ ტრენინგების ციკლი იწყება. სემინარი ადგილობრივი არასამთავრობო ორგანიზაციის წარმომადგენლებისა და ჟურნალისტებისთვის ტარდება. პროექტს საქართველოში ჰაინრიჰ ბიოლის ფონდის სამხრეთ კავკასიის ოფისი, ევროკავშირი და პარტნიორი ქართული უფლებადამცველი ორგანიზაცია - ადამიანის უფლებათა ცენტრი ერთობლივად ახორციელებენ.
როგორც "ჯი-ეიჩ-ენს" პროექტის ერთ-ერთმა მონაწილემ, იურისტმა არჩილ კაიკაციშვილმა განუცხადა, სემინარი 25 სექტემბერს საქართველოს ორ რეგიონში - აჭარასა და ახალციხეში ჩატარდება.
"თავდაპირველად, პროექტში 12 მონაწილე შეგვარჩიეს. თემაზე ოთხდღიანი სემინარი ნილ ჯერმანიმ, ბელფასტის კონფლიქტების კვლევის ინსტიტუტის დირექტორმა წაგვიკითხა. ჩვენი შეხვედრა საინტერესო იყო თემის ირგვლივ ქართული და უცხოური გამოცდილების დახასიათებით. ამჟამად საქართველოს ექვს რეგიონში ადგილობრივი მედიისა და არასამთავრობო სექტორის წარმომადგენლებისთვის მოვამზადებთ შეხვედრას. 25 სექტემბერს უშუალოდ აჭარაში გავუძღვები ღონისძიებას, ჩემი კოლეგები კი - ახალციხეში. სემინარი უკვე ჩატარდა თბილისში. თითოეული სემინარი გამორჩეულია იმითაც, რომ ტრენერები დამოუკიდებელი ვართ თემის ირგვლივ მომზადებული პროგრამის შერჩევასა და წარმოდგენაში. სემინარი, პირობითად, ორი მიმართულებით უნდა წარმოვიდგინოთ - პრაქტიკა და პრობლემის სამართლებრივი მხარე. დღეს ბევრს საუბრობენ, დასაშვებია თუ არა სუძულვილის ენის კრიმინალიზაცია საქართველოში, რადგანაც ბოლო წლების მაგალითები ასეთ მოსაზრებებს საზოგადოებაში სულ უფრო ხშირად აჩენს. ვფიქრობ, რომ ტრენინგი მსჯელობით და დისკუსით საინტერესო და პრაქტიკული იქნება", - განაცხადა კაიკაციშვილმა.
მისი განცხადებით, სემინარში მონაწილეობა შეზღუდულია და აუდიტორია 20 მონაწილითაა განსაზღვრული. ბათუმში ტრენინგს სახალხო დამცველის წარმომადგენლობა უმასპინძლებს.
