მარტვილის სამონასტრო კომპლექსში ძველმა მარანმა პირვანდელი სახე დაიბრუნა - ისტორიული მარანი, როგორც აღდგენილი ძეგლი და ტურისტების თავშეყრის საუკეთესო ადგილი. განახლებული მარნის პრეზენტაციას საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ვაჩეიშვილი დაესწრება.
დღეს, 25 სექტემბერს, საქართველოს მართლმადიდებლური ეკლესია წმინდა მღვდელმთავრის - გიორგი ჭყონდიდელს იხსენიებს. გიორგი ჭყონდიდელმა, რომელმაც აღზარდა მეფეთ-მეფე დავით აღმაშენებელი და მთელი სიცოცხლე საქართველოს თავისუფლებას შესწირა განსაკუთრებული კვალი დატოვა ერის ისტორიაში.
ამ დღესთან დაკავშირებით მარტვილის საკათედრო ტაძარში სამონასტრო კომპლექსის ახლად აღდგენილი უძველესი მარნის პრეზენტაცია გაიმართება. საქართველო კულტურული მემკვიდრეობის დაცვის ეროვნული სააგენტოს დაფინანსებით ისტორიული მარნის რესტავრაცია ორი წლის განმავლობაში მიმდინარეობდა.
დიმიტრი ერმაკოვის ფოტოებზე და სხვა საარქივო მასალებზე დაყრდნობით, დიდი ძალისხმევის შედეგად მონასტრის ამ მნიშვნელოვანი არქიტექტურული ძეგლის განახლება მაინც მოხერხდა.
ძველი მარანი მარტვილის სამონასტრო კომპლექსის ჩრდილო-აღმოსავლეთ კუთხეში მდებარეობს. მარნის განადგურებული კედლები რესტავრაციისას გალავნის წყობის მიხედვით რიყის ქვისა და ნატეხი ქვის წყობით აღადგინეს. განახლდა ქვევრები და მარანმა დაიბრუნა თავისი ფუნქცია. დარბაზიდან აღმოსავლეთ კედელზე გაკეთდა მცირე ხის აივანი. მოეწყო კრამიტის გადახურვა. ახლად აგებულ ერთსართულიან ნაგებობაში მოეწყო სადეგუსტაციო დარბაზი და საინფორმაციო სივრცე.
დღესვე ნიკოლოზ ვაჩეიშვილი სპეციალისტებთან ერთად ახლად აღდგენილ მარანს მოინახულებს და 2012 წელს სამეგრელოს რეგიონში განსახორციელებელ სარესტავრაციო სამუშაოებს დაგეგმავს.
