აღმოსავლეთ პარტნიორობის სამოქალაქო საზოგადოების ფორუმის ეროვნული პლატფორმის წევრი ორგანიზაციები შეშფოთებას გამოთქვამენ სამართალდამცავი ორგანოების წარმომადგენლების მიერ 2011 წლის 15 სექტემბრის საღამოს ქუთაისის მეტალურგიული ქარხანა ‘'ჰერკულისის'' გაფიცული და მოშიმშილე პროფკავშირის წევრების უკანონო დარბევისა და დაკავების ფაქტების გამო. ამის შესახებ "ჯი-ეიჩ-ენს" აღმოსავლეთ პარტნიორობის სამოქალაქო საზოგადეობიდან აცნობეს.
"აღმოსავლეთ პარტნიორობის საქართველოს ეროვნული პლატფორმის წევრის, გაერთიანებული პროფკავშირების მიერ მოწოდებული ინფორმაციის მიხედვით, საწარმო ‘'ჰერკულესის'' მუშებმა გამოიყენეს საქართველოს კონსტიტუციის 33-მუხლით გარანტირებული გაფიცვის უფლება ქარხანაში არსებული გაუსაძლისი შრომითი პირობებისა გაუმჯობესებისა და პროფკავშირული საქმიანობის გამო უკანონოდ განთავისუფლებული 17 კოლეგის სამუშაოზე აღდგენის მოთხოვნით. სრულმასშტაბიან გაფიცვას, რომელიც დაიწყო 13 სექტემბრს წინ უძღოდა 2 სექტემბრის გამაფრთხილებელი გაფიცვა. საგაფიცვო პროცედურები განხორცილებული იქნა საქართველოს კანონმდებლობის მოთხოვნათა სრული დაცვით. შესაბამისად, სამართალდამცავი ორგანოების წარმომადგენლების მიერ მიღებული გაფიცვის დაშლის გადაწყვეტილება კანონიერ საფუძველს იყო მოკლებული", - აღნიშნულია განცხადებაში.
საქართველოს ეროვნული პლატფორმის წევრი ორგანიზაციები გმობენ სამართალდამცავი ორგანოების მიერ განხორცილებულ კანონსაწინააღმდეგო ქმედებებს და მიაჩნიათ, რომ ხელყოფილი იქნა გაფიცვის, გაერთიანების თავისუფლების, კოლექტიური მოლაპარაკების წარმოების, შეკრების, შრომის თავისუფლების ფუნდამენტური უფლებები.
"აღნიშნული ქმედება ასევე შეიცავს საქართველოს სისხლის სამართლის კოდექსით დასჯად დანაშაულთა ნიშნებს, როგორიცაა გაფიცვის უფლების ხელყოფა, თავისუფლების უკანონო შეზღუდვა, შეკრებისა და მანიფესტაციის უფლების ხელყოფა, პროფკავშირული კუთვნილების გამო დევნა და დისკრიმინაცია", - აღნიშნულია განცხადებაში.
