გურჯაანის რაიონის სოფელ კარდენახის საჯარო სკოლის დირექტორი მაკა ვღლიღვაშვილი პირველკლასელებს პრეზიდენტის ნაჩუქარ ნეტ-ბუკებს არ აძლევს. დირექტორმა პირველკლასელების მშობლებს ნეტბუკების მიღება - ჩაბარების აქტებზე ხელი მოაწერინა, მაგრამ სკოლიდან არ გაატანა.
„ნეტ-ბუკის მიღება - ჩაბარების აქტზე ხელი მოგვაწერინა, სახლში წაღების უფლებას კი არ გვაძლევს, გააფუჭებთო. თუ უახლოეს დღეებში ნეტ-ბუკების სახლში წაღების უფლებას არ მოგვცემს, განათლების სამინისტროში ვუჩივლებთ," - განუცხადეს კახეთის საინფორმაციო ცენტრს პირველკლასელების მშობლებმა.
სკოლის დირექტორის მაკა ვღვლიღვაშვილის განმარტებით, ნეტ-ბუკები სახლში თვითონ მშობლებს არ მიაქვთ. „მათი სურვილია, რომ ბავშვი ნეტ-ბუკთან მუშაობას სკოლაში მიეჩვიოს", - აღნიშნა დირექტორმა.
შეგახსენებთ, რომ 17 სექტემბერს, საქართველოს განათლებისა და მეცნიერების მინისტრის მოადგილემ გიორგი ჩახნაშვილმა პრეზიდენტის მიერ პირველკლასელთათვის ნაჩუქარ კომპიუტერებთან დაკავშირებით საგანგებო ბრიფინგი გამართა. „როგორც საზოგადოებისთვის არის ცნობილი, 15 სექტემბერს, საქართველოს მასშტაბით ყველა საჯარო სკოლის პირველკლასელს სკოლაში პრეზიდენტის საჩუქარი კომპიუტერი - „ბუკი" დახვდა. სამწუხაროდ, რამდენიმე პოლიტიკურმა პარტიამ ამ თემით სპეკულირება დაიწყო და ცრუ ინფორმაცია გაავრცელა იმის შესახებ, თითქოს კომპიუტერები ბავშვების საკუთრება არ არის და მისი დაზიანების შემთხვევაში მშობელი ჯარიმის სახით 700 ლარს გადაიხდის. ინფორმაციამ მშობლებში გაურკვევლობა გამოიწვია. განვმარტავ, რომ ნეტ-ბუკი არის საჩუქარი და შესაბამისად, გადადის მოსწავლის საკუთრებაში", - განაცხადა მინისტრის მოადგილემ.
