"იმიჯ ცენტრის" დირექტორმა ია კიწმარიშვილმა "მის სამყაროს" ქართველ წარმომადგენელთან დაკავშირებით "ჯი-ეიჩ-ენის" კითხვებს უპასუხა.
"ეკა ღურწკაიამ თავისი შესაძლებლობები კარგად წარმოაჩინა. დიდი ყურადღება იყო მის მიმართ, თუმცა შედეგი უკვე ვიცით: ძალიან ლამაზმა ფერადკანიანმა გოგონამ გაიმარჯვა. როდესაც ტელევიზორში ვუყურებდი, სწორედ მას ვგულშემატკივრობდი. არაჩვეულებრივი გამარჯვებული ჰყავთ, თუმცა ჩვენს შემთხვევაში ვერაფერს ვიზამთ. ეს იგივეა, როგორც სპორტში: ფეხბურთელები ყოველწლიურად მონაწილეობენ მსოფლიო ჩემპიონატებზე, მაგრამ ყოველთვის პრიზი არ ჩამოაქვთ", - განაცხადა კიწმარიშვილმა.
შეგახსენებთ, რომ საქართველოდან ბრაზილიაში "იმიჯ ცენტრის" მოდელი, პირველი ვიცე-მის "საქართველო 2010" ეკა ღურწკაია გაემგზავრა. ქართველი მოდელის მხარდასაჭერად საქართველოდან არავინ იმყოფებოდა.
"ეს განაპირობა იმან, რომ ეს ქვეყანა ძალიან შორს არის. იმისათვის, რომ ბრაზილიის ვიზა აიღო, უნდა გაემგზავრო თურქეთში, სადაც ბიუროკრატიული ბარიერები უნდა გაიარო. მხოლოდ ეს იყო ძირითადი მიზეზი. ამას სჭირდებოდა დრო, პირადად მე არ მეცალა ვიზაზე სარბენად. იქ არყოფნა ჩემთვის პრობლემას არ წარმოადგენს. ეს საბავშო ბაღი არ არის, სილამაზის კონკურსია, სადაც გოგონა თავად მიემგზავრება. ფინალურ ღონისძიებას რაც შეეეხება, თუ მოვიცალე და სურვილი მექნება, წავალ", - აღნიშნა კიწმარიშვილმა.
ცნობისთვის, 24 წლის ეკა ღურწკაია ბრაზილიაში რამდენიმე კვირას იმყოფებოდა და საქართველოში 15 სექტემბერს ჩამოვიდა.
