გია ორაგველიძის ოჯახი ლანჩხუთის კლინიკის ექიმებს დაუდევრობაში ადანაშაულებს. ისინი ამბობენ, რომ კუჭის წყლულით დაავადებულ მამაკაცს შეუთავსებელი სისხლი გადაუსხეს.
როგორც ახლობლები საუბრობენ, ავადმყოფს სისხლის თავსებადობაზე არანაირი ანალიზი არ ჩასტარებია. ორაგველიძის ოჯახის წევრები ავადმყოფის გარდაცვალების მიზეზად სწორედ ამას ასახელებენ.
მდგომარეობის გართულების შემდეგ, ოჯახის წევრებმა პაციენტი ლანჩხუთის სავადმყოფოდან ქუთაისში გადაიყვანეს. თუმცა მდგომარეობა იმდენად მძიმე იყო, რომ ავადმყოფის თბილისში ტრანსპორტირება გახდა აუცილებელი. მიუხედავად 6 ოპერაციისა, პაციენტი რესპუბლიკურ საავადმყოფოში მაინც გარდაიცვალა.
"ქრონიკა" ლანჩხუთის სავადმყოფოსაც ეწვია, თუმცა გადამღებ ჯგუფს კლინიკის მუშაკები აგრესიულად შეხვდნენ. ვიდეოკამრებეის დანახვაზე დირექტორმა თინათინ გოგუაძემ კომენტარის გაკეთებაზე უარი განაცხადა და კაბინეტში ჩაიკეტა.
ექიმი, რომელსაც გარდაცვლილის ოჯახის წევრები უმძიმეს დანაშაულს უყენებენ, ლანჩხუთის სავადმყოფოში აღარ მუშაობს. დავით გოგლიჩიძემ პაციენტის გარდაცვალების შემდეგ განცხადება დაწერა და სამსახური დატოვა. გოგლიჩიძე დანაშაულს არ აღიარებს და ამბობს, რომ პაციენტს ყველა გამოკვლევა ჩაუტარდა და სისხლი ამის შემდეგ გადაესხა.
"ვერ ვიტყვი, რომ მისი გარდაცვალების მიზეზი სისხლის გადასხა იყო, თუმცა ვერც გამოვრიცხავ", - აცხადებს გოგლიჩიძე.
ორაგველიძის საქმეს ჯანდაცვის სამინისტრო განიხლავს.
