ალბერ მეორემ დმანისის არქეოლოგიური გათხრები დაათვალიერა. მან მონაწილეობა მიიღო დმანისის ერთ-ერთ აღმოჩენაში და დავით ლორთქიფანიძესთან ერთად მიწიდან პირველმა ამოიღო მილიონ რვაასი ათასი წლის წინანდელი მგლის თავის ქალა.
პრინცი არქეოლოგების ახალ აღმოჩენებსაც გაეცნო. მასთან ერთად იმყოფებოდა პარიზის პალეონტოლოგიის ინსტიტუტის დირექტორი ანრი დელუბლე.
"ძალიან შთამბეჭდავი ადგილია. დმანისის შესახებ რამდნეიმე წლის წინ შევიტყვე და სწორედ ამიტომ გადავწყვიტე აქ მოსვლა. პირადად ვიცნობ პროფესორ ლორთქიფანიძეს, ურთიერთობა მაქვს პალეონტოლოგიურ ფონდთან. უნდა აღვნიშნო, რომ ჩემი ბაბუაც გატაცებული იყო პალეონტოლოგიით. ის, რომ მილიონ რვაასი ათასი წლის წინ აქ ადამიანები ცხოვრობდნენ, ძალიან დიდი გარღვევაა ამ სფეროში. დიდი მადლობა მოწვევისთვის", - აღნიშნა მონაკოს პრინცმა.
აღსანიშნავია, რომ პრინცს არქეოლოგიური ფონდი აქვს დაარსებული. ამიტომ მას ეს სფერო განსაკუთრებით აინტერესებს.
