სასამართლოებისა და სამედიცინო დაწესებულებების მიერ გაცემულ დოკუმენტებს (სასამართლო გადაწყვეტილებები, ცნობა ჯანმრთელობის შესახებ და სხვა) აპოსტილით იუსტიციის სახლებსა და სამოქალაქო რეესტრის სააგენტოს ტერიტორიულ სამსახურებში დაამოწმებენ.
ახალი სერვისის შესახებ, დღეს ბრიფინგი იუსტიციის სამინისტროს სამოქალაქო რეესტრის სააგენტოს თავმჯდომარის მოადგილემ გიორგი გაბრიელაშვილმა გამართა.
მისი თქმით, ადრე სასამართლოს მიერ გაცემულ დოკუმენტებს აპოსტილით ამოწმებდა და ლეგალიზებას უკეთებდა უზენაესი სასამართლო, ხოლო ჯანდაცვის მიერ გაცემულ დოკუმენტებს - შრომის, ჯანმრთელობისა და სოციალური დაცვის სამინისტრო.
აღსანიშნავია, რომ სამოქალაქო რეესტრის სააგენტო მოქალაქეებს კიდევ ერთ სიახლეს სთავაზობს. ამჟამად საზღვარგარეთ წარსადგენ დოკუმენტებს აპოსტილით მესტიის იუსტიციის სახლიც დაამოწმებს. ადრე მაღალმთიან რეგიონში ამგვარი სერვისის მიღება შეუძლებელი იყო და მოქალაქეს მომსახურების მისაღებად სხვა რეგიონში უწევდა გადაადგილება.
საქართველოს მოქალაქეებს საზღვარგარეთ წარსადგენად ხშირად სჭირდებათ აპოსტილით დამოწმებული დაბადების, ქორწინების მოწმობებისა და სხვა საბუთების წარდგენა. დღეს უკვე დოკუმენტის აპოსტილით დამოწმებასა და ლეგალიზაციაზე საბუთებს მიიღებენ და გასცემენ: ბათუმის, რუსთავის, მესტიის, იუსტიციის სახლები, თბილისის ნებისმიერი ტერიტორიული სამსახურები, ქუთაისის, თელავის, ზუგდიდის, ფოთის, ოზურგეთისა და ახალციხის ტერიტორიულ სამსახურებიც. ამავე სამსახურებში ხდება საზღვარგარეთ წარსადგენი ნებისმიერი დოკუმენტის სხვადასხვა ენაზე თარგმნაც.
რაც შეეხებათ უცხოეთში მყოფ საქართველოს მოქალაქეებს, მათ ამ სერვისის მიღება ონლაინში შეუძლიათ - უნდა იხილონ ვებგვერდი www.passport.gov.ge და გააკეთონ განცხადება დოკუმენტის აპოსტილით დამოწმების თაობაზე.
ცნობისთვის, ლეგალიზაცია/აპოსტილით დამოწმება გულისხმობს დოკუმენტზე არსებული ხელმოწერის ნამდვილობის, ხელმომწერი პირის უფლებამოსილების, ბეჭდის ან შტამპის ნამდვილობის დამოწმებას. საქართველოში გაცემული და დამოწმებული დოკუმენტების სანდოობის ხარისხის ასამაღლებლად შეიქმნა უპრეცედენტო, მაღალტექნოლოგიური დამცავი მექანიზმი - აპოსტილით დამოწმებული დოკუმენტების ელექტრონული რეესტრი. აპოსტილის სტიკერზე მითითებულ ვებ-გვერდზე უცხო ქვეყნის ორგანოებს, რომელთაც წარედგინებათ საქართველოში დამოწმებული დოკუმენტი, შეუძლიათ აპოსტილის უნიკალური ნომრისა და გაცემის თარიღის მიხედვით გადაამოწმონ მისი ნამდვილობა.
ერთი დოკუმენტის ლეგალიზაცია/აპოსტილით დამოწმება რვა სამუშაო დღის განმავლობაში 20 ლარი ღირს. სამოქალაქო რეესტრი დოკუმენტების დამოწმების კუთხით, მოსახლეობას დაჩქარებულ მომსახურებასაც სთავაზობს. დოკუმენტების აპოსტილით დამოწმება ოთხ სამუშაო დღეში 40 ლარი ღირს, მეორე დღეს - 70 ლარი, ხოლო იმავე დღეს 100 ლარი.
