იულია ტიმოშენკოს ქალიშვილი ევგენია კარი, დედის ჯანმრთელობის მდგომარეობის გამო შეშფოთებას გამოთქვამს, იმ შემთხვევაში თუ ტიმოშენკოს ხანგრძლივი ვადით გისოსებს მიღმა ყოფნას მიუსჯიან. ინფორმაციას ამის შესახებ "The Financial Times"-ი ავრცელებს.
"სასამართლო პროცესი რომელიც ტიმოშენკოს მიმართ მიმდინარეობს, იანუკოვიჩისათვის დემოკრატიის ტესტად აღიქმება", _ წერს გაზეთი.
50 წლის იულია ტიმოშენკო, რომელიც ბოლო ორი თვის განმავლობაში კიევის სასამართლოში 12 საათს ატარებს სულ უფრო და უფრო დათრგუნულად გამოიყურება. წერს გაზეთი და აღნიშნავს, რომ აგვისტოს დასაწყისში ტიმოშენკო გისოსებს მიღმა მოათავსეს, სასამართლოს უპატივცემულობის ბრალდებით.
უკრაინის უმაღლესი რადის რწმუნებულმა ადამიანის უფლებათა დაცვის საკითხებში ნინა კარპაჩევამ ტიმოშენკო წინასწარი დაკავების იზოლატორში მოინახულა და დაადასტურა, რომ ყოფილ პრემიერს მაღალი სიცხე აქვს. მალევე ტიმოშენკოს დამცველმა სერგეი ვლასენკომ განაცხადა, რომ ტიმოშენკოს ჯანმრთელობის მდგომარეობა გაუარესებულია და მას მაღალი სიცხე აქვს.
"ტიმოშენკო დღეს მართლაც ავად არის. არის გარკვეული დაავადება ყელთან მიმართებაში და მე ვიგრძენი, რომ მას მაღალი სიცხეც აქვს", _ განაცხადა ომბუდსმენმა პრესკონფერენციაზე. მისივე თქმით, ტიმოშენკოს საუბარიც უჭირს.
ომბუდსმენმა ასევე განაცხადა, რომ პირობები, რომელშიც ყოფილი პრემიერი იმყოფება მის მეზობლად მდებარე ქალების საკნის პირობებისაგან არ განსხვავდება. მისივე თქმით, იულია ტიმოშენკომ მისი თანდასწრებით, უარი განაცხადა იმაზე, რომ მისთვის სამედიცინო გამოკვლევა ჯანდაცვის სამინისტროს სამედიცინო კომისიას ჩაეტარებინა და მოითხოვს, რომ მისი ჯანმრთელობის მდგომარეობის გამოკვლევით მხოლოდ მისი პირადი ექიმი დაკავდეს, რომელსაც იგი ენდობა.
შეახსენებთ, რომ უკრაინის ექს-პრემიერი 5 აგვისტოს დააკავეს.