კომუნიკაციების ეროვნული კომისიის ურთიერთობა "თრიალეთთან" სულ უფრო დაძაბული ხდება და ყოველდღიურად მწვავდება, ნათქვამია ტელერადიოკომპანია თრიალეთია მიერ გავრცელებულ ინფორმაციაში რომელსაც უცველელად გთავაზობთ:
ამჟამად, კომისიის თავმჯდომარის მუქარები "თრიალეთის" წერილმა გამოიწვია, სადაც იგი ითხოვდა კომისიას ისევე მოეხდინა "თრიალეთის" ლიცენზიის მოდიფიცირება, როგორც ეს მოხდა, კომისიის თავმჯდომარის მეგობრის და საქმიანი პარტნიორის, გეგეშიძის კომპანია "რუსთავი 2"-ის შემთხვევაში.
მისი საქმიანი პარტნიორის და წარსულში მის საკუთრებაში მყოფი ტელეკომპანიის ხსენებამ გამოიწვია ჩიქოვანის განაწყენება და მან, კომისიაში ვითომ საკითხის მოგვარებისთვის დაბარებული "თრიალეთის" დირექტორი ჯონი
ნანეტაშვილი შეიყვანა თავის კაბინეტში და დაემუქრა:
"შენ ვინ გგონივარ, ასეთ წერილს რომ მწერ! ეხლა კარებს მივხურავ და ქუჩურად დაგელაპარაკები! იცოდე, რომ ბევრს წააგებ ამ წერილის გამო!"
ჩვენ არ ვიცით რას გულისხმობდა ჩიქოვანი ამ მუქარებით, მაგრამ ყოველდღე ვგრძნობთ, რომ კომუნიკაციების ეროვნული კომისიის ზეწოლების გამო ტელე-რადიო კომპანია "თრიალეთს" მაუწყებლობის შეჩერების საფრთხე ემუქრება!
უკვე გაუსაძლისი ხდება მარეგულირებელ კომისიასთან ურთიერთობა. კომისიის თავმჯდომარის ცინიკური მოპყრობა და საერთოდ, კომისიის მუშაობა "თრიალეთის" მიმართ მხოლოდ ზეწოლებით შემოიფარგლება.
ასე იყო დიმიტრი ქიტოშვილის თავმჯდომარეობის დროს, სანამ იგი ციხეში არ აღმოჩნდა. ასე გრძელდება ირაკლი ჩიქოვანის თავმჯდომარეობისას, მაგრამ იმედი გვაქვს, რომ ამასაც ექნება რაიმე დასასრული...
"თრიალეთი" უკვე რამდენიმე წელია ითხოვს ლიცენზიის მოდიფიცირებას და ცუდი და ხარვეზიანი სიხშირის შეცვლას, რომელიც მსოფლიოს სხვა ქვეყნებში არ გამოიყენება.
გასულ წლებში კომისია სხვადასხვა მეთოდებით ცდილობდა დროის გაწელვას. ახლა კი, კომისიის წევრები გვიცხადებენ, რომ მართლები ხართ და კანონით გეკუთვნით სიხშირის შეცვლა, მაგრამ ციფრულ მაუწყებლობაზე გადასვლის გამო, ვალდებულები ვართ გორში სიხშირის გაცემასთან დაკავშირებით რუსეთის მხარე ჩავაყენოთ საქმის კურსში, მაგრამ ჩვენ რუსეთს არ ველაპარაკებით და სიხშირესაც ვერ შეგიცვლითო...
ეს ყველაფერი აჩენს კითხვებს, რომლის პასუხსაც არავინ არ გვაძლევს: რას ნიშნავს, რომ კანონით გეკუთვნის, მაგრამ არ გაძლევენ? რა კანონია თუ კი ვერ შესრულდება? ან ჩვენ რა შუაში ვართ, ჩვენ რატომ უნდა დავზარალდეთ? ან რატომაა, რომ "რუსთავი 2"-სთვისაა შესაძლებელი და ჩვენთვის არა?
ჩვენ კიდევ მივმართავთ კომუნიკაციების ეროვნულ კომისიას და მოვითხოვთ სიხშირის შეცვლას. ასევე, მოვითხოვთ, გაგვცენ წერილობითი პასუხი ზემოთ აღნიშნულ მიზეზთან დაკავშირებით.
