22-24 სექტემბერს სტამბულში მოდის საერთაშორისო ბრენდებისა და დიზაინერების თრეიდ შოუ (CPI-Collection Premiere Istanbul) გაიმართება, რომელიც წარმოადგენს ერთ-ერთ ყველაზე მასშტაბურ გამოფენას ევრაზიის რეგიონში და თავს უყრის მსოფლიოს სხვადასხვა ბრენდსა და დიზაინერს. თრეიდ შოუზე წარმოდგენილია ქალის და მამაკაცის, ბავშვის ტანსაცმლის უახლესი კოლექციები და აქსესუარები.
საქართველოს ეროვნული საინვესტიციო სააგენტოს დირექტორი ქეთი ბოჭორიშვილი მონაწილეობას მიიღებს საერთაშორისო ბრენდებისა და დიზაინერების თრეიდ შოუში, გამართავს ინდივიდუალურ შეხვედრებს სამკერვალო ინდუსტრიის წარმომადგენლებთან და გააცნობს საფეიქრო ბიზნესის განვითარების კუთხით საქართველოს შესაძლებლობებსა და ქვეყანაში არსებულ საინვესტიციო კლიმატს.
თრეიდ შოუს მონაწილეთა შორის იქნებიან საფეიქრო ინდუსტრიის წარმომადგენლები, კერძოდ: ტანსაცმლის და ტექსტილების მწარმოებლები, საცალო და საბითუმო ვაჭრობით დაკავებული კომპანიები, ტანსაცმლის მაღაზიების მფლობელები, დისტრიბუტორები და მოდის აგენტები.
Collection Premiere Istanbul-ის დროს ბოჭორიშვილი სამკერვალო ინდუსტრიის წარმომადგენლებს მიაწოდებს ინფორმაციას 13-15 ოქტომბერს ქ. თბილისსა და ქ. ბათუმში საქართველოს ეროვნული საინვესტიციო სააგენტოს მიერ დაგეგმილ საფეიქრო ინდუსტრიის ბიზნეს ფორუმთან დაკავშირებით, რომელიც ტარდება საქართველოს მოდის კვირეულის პარალელურად. ბიზნესფორუმს გახსნის საქართველოს ეკონომიკისა და მდგრადი განვითარების მინისტრი ვერა ქობალია. ფორუმის ფარგლებში მოწვეული პოტენციური ინვესტორებისთვის გაიმართება გასვლითი ვიზიტები საქართველოს სხვადასხვა რეგიონში, სადაც შესაძლებელია ახალი სამკერვალო ფაბრიკების აშენება ან არსებულის განახლება. საფეიქრო ინდუსტრიის ბიზნესფორუმში მონაწილეობას მიიღებენ ასევე ქართული სამკერვალო ფაბრიკების წარმომადგენლები.
