სრულიად საქართველოს კათოლიკოს-პატრიარქის, უწმინდესის და უნეტარესის ილია მეორის განცხადებით, დარიალის ხეობაში, სქართველო-რუსეთის საზღვართან, 15 სექტემბერს წმინდა მთავარანგელოზის მამათა მონასტერი გაიხსნება.
"შემთხვევითი არ არის, რომ მონასტერი შენდება - ეს იქნება საქართველოს დაცვა", - ბრძანა პატრიარქმა დღეს, საკვირაო წირვის შემდეგ ქადაგებისას.
მისივე თქმით, 14 სექტემბერს მთელი ღამის განმავლობაში ტაძარში პარაკლისებს ჩაატარებენ, 15 სექტემბერს კი მამათა მონასტერი საზეიმოდ გაიხსნება და შესრულდება პირველი წირვა, რომელსაც თავად პატრიარქი აღავლენს.
ილია მეორე მოუწოდებს მრევლს, "ვისაც საშუალება აქვს", მონასტერში თითო ტომარა ფქვილი, ერთი ბოთლი წითელი ღვინო და ერთი ბოთლი ზეთი წაიღონ. პატრიარქი ამბობს, რომ ეს მნიშვნელოვანია არა მხოლოდ მონასტრისთვის, არამედ ადგილობრივი მოსახლეობისთვისაც.
პატრიარქმა დღეს იოანე ნათლისმცემლის თავის კვეთის ისტორიაზეც იქადაგა.
"რთულია ადამიანის ბუნება, ჯოჯოხეთიდან შეიძლება ზეცად ამაღლდეს ან პირიქით, შეიძლება დაეცეს. დღეს ჩვენ კიდევ ერთხელ ვფიქრობთ იმის შესახებ, საით მივდივართ, ვინ ვართ და ვინ ვიქნებით მომავალში", - ბრძანა პატრიარქმა.
დღესვე უწმინდესმა მამა გიორგი ფეიქრიშვილი გაწეული ღვაწლისთვის მიტრის ტარების უფლებით დააჯილდოვა.
