"ქრისტიან-დემოკრატები" განაგრძობენ კამპანიას ყველა ასაკობრივი პენსიონერის სახელმწიფო დაზღვევით უზრუნველყოფის შესახებ. თელავის რაიონის სოფელ კონდოლში დღეს გიორგი ახვლედიანი და ნიკა ლალიაშვილი იმყოფებოდნენ. პარლამენტის წევრები ოთარაშვილების ოჯახს ესტუმრნენ.
"ამ ოჯახში 2 პენსიონერი 2 ბავშვს ზრდის და მათი შემოსავლის უმეტესი წილი მედიკამენტებსა და მკურნალობას ხმარდება. იმ შემთხვევაში თუ მთავრობა ყურად იღებს ჩვენს ინიციატივას და ყველა პენსიონერს მისცემს სახელმწიფო დაზღვევის პოლისს, ოთარაშვილების და ბევრი სხვა ოჯახი თავის მწირ შემოსავალს სხვა მიმართულებით გამოიყენებს, რაც მათ ამოსუნთქვის საშუალებას მისცემს" - განაცხადა ახვლედიანმა.
"ქრისტიან-დემოკრატების" თქმით, მინიმალური პენსიის 100 ლარამდე გაზრდის და ქდმ-ს ინიციატივის შედეგად დედაქალაქსა და რეგიონებში პენსიის გათანაბრების მიუხედავად, ყველაზე დაუცველები ქვეყანაში კვლავ პენსიონერები რჩებიან.
ახვლედიანის განცხადებით, დღეს არსებული სახელმწიფო პროგრამები ძალზე არაეფექტურად მუშაობს და ქდმ უკვე დიდი ხანია ითხოვს, ამ პროგრამების გაუქმების შედეგად გამოთავისუფლებული თანხებით მთავრობამ ყველა პენსიონერი დააზღვიოს. საუბარია ბიუჯეტით გათვალისწინებული 184 მილიონი ლარიდან 640 ათასი პენსიონერის სადაზღვევო პოლისით უზრუნველყოფაზე, რაც დაახლოებით იგივე დანახარჯებზე გათვლილი, მაგრამ გაცილებით ეფექტური პროექტი იქნება.
პენსიონერებთან შეხვედრის შემდეგ "ქრისტიან-დემოკრატების" ლიდერებმა სოფელ კონდოლის მოსახლეობას თელავის რაიონის მაჟორიტარობის კანდიდატი ნიკოლოზ ლაშხი წარუდგინეს. თელავში შუალედური არჩევნები 2 ოქტომბერს გაიმართება.
