დღეს, 9 სექტემბერს, 18:00 საათზე, სასტუმრო "თბილისი-მარიოტში" გაიმართება სახელმძღვანელოს - "ადამიანის უფლებები ჯანმრთელობის დაცვის სფეროში" - პრეზენტაცია.
პუბლიკაცია პრაქტიკული დანიშნულებისაა და წამოადგენს გზამკვლევს იურისტებისთვის, რათა მათ გაუადვილდეთ სამართლებრივი ინსტრუმენტების გამოყენება ჯანდაცვის სფეროში ადამიანის უფლებების დასაცავად. სახელმძღვანელოში განხილულია კონსტიტუციური დებულებები, კონვენციები, კანონები, კანონქვემდებარე ნორმატიული აქტები, სამედიცინო მომსახურების გამწევის და პაციენტის უფლება-მოვალეობანი და პაციენტებთან და ჯანდაცვის მომსახურების მიმწოდებლებთან დაკავშირებული რეალური მაგალითები და საქმეები.
გამოცემაზე მუშაობდნენ ფონდი "ღია საზოგადოება-საქართველოს" კანონის, მედიისა და ჯანმრთელობის ინიციატივა, ღია საზოგადოების ინსტიტუტის საზოგადოებრივი ჯანდაცვის პროგრამა და ადამიანის უფლებებისა და კანონის უზენაესობის პროგრამები.
სახელმძღვანელოს ავტორები არიან საქართველოს უზენაესი სასამართლოს თავმჯდომარის მოადგილე ზაზა მეიშვილი, დასავლეთ საქართველოს საოლქო პროკურორი ალექსანდრე იმედაშვილი, საქართველოს ბიოეთიკის ეროვნული საბჭოს თავმჯდომარე გივი ჯავაშვილი, ფონდი "ღია საზოგადოება-საქართველო", კანონის, მედიისა და ჯანმრთელობის ინიციატივის დირექტორი ნინო კიკნაძე, იურისტი კახაბერ ასლანიშვილი, საქართველოს შრომის, ჯანმრთელობისა და სოციალური დაცვის სამინისტროს აპარატის უფროსი ნინო მირზიკაშვილი, თბილისის სახელმწიფო სამედიცინო უნივერსიტეტი, საზოგადოებრივი ჯანდაცვის სკოლის დეკანი მამუკა ჯიბუტი.
მასალის გამოყენების პირობები
