სამოქალაქო საზოგადოების წარმომადგენლები შეშფოთებას გამოთქვამენ საია-ს მიმართ აგორებული ნეგატიური კამპანიის გამო და თანადგომას უცხადებენ საქართველოს ახალგაზრდა იურისტთა ასოციაციას. ამის შესახებ არასამთავრობო ორგანიზაციების მიერ საია-ს მხარდასაჭერ განცხადებაშია ნათვამი.
"დაუშვებელია სამოქალაქო საზოგადოების წარმომადგენლებზე დაუსაბუთებელი თავდასხმა, რათა არ მოხდეს საზოგადოების თვალში ამ ორგანიზაციის და მთლიანად არასამთავრობო სექტორის დისკრედიტაცია. მოვუწოდებთ მასმედიის წარმომადგენლებს, კერძოდ, სამაუწყებლო კომპანია რუსთავი-2-ს და ტელეკომპანია "იმედს", დაიცვან ჟურნალისტური ეთიკის ნორმები საინფორმაციო სიუჟეტის მომზადებისას და საჯაროდ ბოდიში მოიხადონ საია-სა და საქართველოს მოსახლეობის წინაშე ფაქტების დამახინჯებით გაშუქების გამო. მოვუწოდებთ საქართველოს ხელისუფლებას, დაუყოვნებლივ განაახლოს გამოძიება მოქალაქე ნიკა კვინტრაძის გარდაცვალების ფაქტთან დაკავშირებით და გამოძიების შედეგები აცნობოს საზოგადოებას", - აღნიშნულია განცხადებაში.
არასამთავრობო ორგანიზაციებმა "საქართველოს ახალგაზრდა იურისტთა ასოციაციის" მხარდამჭერი აქცია გამართეს "საქართველოს ახალგაზრდა იურისტთა ასოციაციის ოფისთან. აქციაში შემდეგი არასამთვრობოები მონაწილეობდნენ: კონსტიტუციის 42-ე მუხლი", "ადამიანის უფლებათა ცენტრი", "21-ე საუკუნე", "მრავალეროვანი საქართველო", "ჯანმრთელი სამყარო", "კოალიცია სამოქალაქო საზოგადოებისათვის", "სამართლიანი არჩევნები", "სამართალი და თავისუფლება" და სხვა არასამთავრობო ორგანიზაციები.
