დღეს, 8 სექტემბერს, 13.00 საათზე, არასამთავრობო ორგანიზაციები "საქართველოს ახალგაზრდა იურისტთა ასოციაციის" მხარდამჭერ აქციას გამართავენ .
როგორც "ჯი-ეიჩ-ენს" აქციის ორგანიზატორებმა აცნობეს, არასამთავრობო ორგანიზაციები სოლიდარობას უცხადებენ "საქართველოს ახალგაზრდა იურისტთა ასოციაციას", რომლის მიმართაც ხელისუფლების მხრიდან შეტევა განხორციელდა.
მას შემდეგ, რაც "საქართველოს ახალგაზრდა იურისტთა ასოციაციამ" ნიკა კვინტრაძის საქმესთან დაკავშირებით ბრიტანული სასამართლო-საექსპერტო ბიუროს დასკვნა გამოაქვეყნა, საპარლამენტო უმრავლესობის ერთ-ერთმა ლიდერმა "ახალგაზრდა იურისტთა ასოციაცია" სიცრუეში დაადანაშაულა, ასევე, ასოციაციას დაუპირისპირდა შს სამინისტროს ანალიტიკური სამსახურის უფროსი შოთა უტიაშვილი.
"დამოუკიდებელი ექსპერტიზის მასალების გამოქვეყნების შემდეგ, სამწუხაროდ არაკორექტული კამპანიური ხასიათის კომენტარები გააკეთდა ახალგაზრდა იურისტთა ასოციაციის მიმართ.
ვთვლით, რომ დაუშვებელია სამოქალაქო სექტორის წარმომადგენლებზე, მსგავსი უაპელაციო კომენტარები და საზოგადოების წინაშე ამ სახით არასამთავრობო სექტორის დისკრედიტაცია.
სამოქალაქო საზოგადოების წარმომადგენლები ვაპროტესტებთ ორგანიზაციის მიმართ საქმიანი რეპუტაციის შემლახველი გამონათქვამებს.
ასევე,არასამთავრობო ორგანიზაციების წარმომადგენლები სოლიდარობას ვუცხადებთ ახალგაზრდა იურისტთა ასოციაციას", - ნათქვამია ორგანიზატორების მიერ გავრცელებულ ინფორმაციაში.
არასამთავრობო ორგანიზაციები სოლიდარობას უცხადებენ "ახალგაზრდა იურისტთა ასოციაციას" და მათი მხარდაჭერის ნიშნად საიას ოფისთან სოლიდარობის აქციას გამართავენ. აქციაში მონაწილეობას მიიღებს "კონსტიტუციის 42-ე მუხლი", "ადამიანის უფლებათა ცენტრი", "21-ე საუკუნე", "მრავალეროვანი საქართველო", "ჯანმრთელი სამყარო", "კოალიცია სამოქალაქო საზოგადოებისათვის", "სამართლიანი არჩევნები", "სამართალი და თავისუფლება" და სხვა არასამთავრობო ორგანიზაციები.
