8 სექტემბერს, 11:00 საათზე, აშშ-ის ელჩი ჯონ ბასი და ჯანდაცვის მინისტრი ანდრია ურუშაძე მარტყოფში, შეზღუდული შესაძლებლობების მოზარდთა განახლებულ სახლს გახსნიან. სახლი 80 მოზარდისთვისაა განკუთვნილი.
როგორც "ჯი-ეიჩ-ენს" საქართველოში აშშ-ის საელჩოდან აცნობეს, აშშ-ის მთავრობამ სარეკონსტრუქციო სამუშაო 600 ათასი დოლარით დააფინანსა: აშშ-ის შეიარაღებული ძალების ევროპულმა სარდლობამ 500 ათასი დოლარი გამოყო, ხოლო აშშ-ის საერთაშორისო განვითარების სააგენტომ (USAID) ავეჯისა და მოწყობილობების შესაძენად - 100 ათასი დოლარი. დღევანდელ ღონისძიებაზე აშშ-ის შეიარაღებული ძალების ევროპულ სარდლობას კონტრადმირალი ენდი ბრაუნი წარმოადგენს.
პროექტს 2009 წელს ჩაეყარა საფუძველი. აშშ-ის საელჩოს თანამშრომლის, ნიკა ფურცელაძის რეკომენდაციით, აშშ-ის საზღვაო ქვეითთა კორპუსის ვიცე-პოლკოვნიკმა დენ ტოულმა მარტყოფის სახლის დასახმარებლად 30 მოხალისე საზღვაო ქვეითი შეკრიბა. საქართველოს შინაგან საქმეთა სამინისტრომ საზღვაო ქვეითებს 30 ქართველი მოხალისე დაახმარა. ქართველი და ამერიკელი მოხალისეები სახლის დასუფთავებასა და მოწესრიგებას შეუდგნენ. ერთობლივ ძალისხმევას უკვალოდ არ ჩაუვლია. აშშ-ის არმიის მაიორმა ჯეისონ ბეიკერმა საფუძვლიანი სარეაბილიტაციო სამუშაოებისათვის აშშ-ის შეიარაღებული ძალების ევროპულ სარდლობას 500 ათასი დოლარის გრანტის გამოყოფა სთხოვა. პროექტში ჩაერთო აშშ-ის საერთაშორისო განვითარების სააგენტო, აგრეთვე ქართველი და ამერიკელი მოხალისეები აშშ-ის საელჩოდან.
მოზარდთა სახლის დირექტორი, ლელა კიკნაძე აცხდებს, რომ სახლში შექმნილია ყველა პირობა, რათა მოზარდებმა დამოუკიდებლად ცხოვრება შეძლონ. საერთო სასადილოს გარდა, სამივე სართულზე განთავსებულია პატარა სამზარეულო და სამრეცხაო სახლის ბინადართათვის. მათსავე განკარგულებაშია კომპიუტერული ოთახი ინტერნეტით და სამედიცინო ოთახი. სამომავლო გეგმა მარტყოფის სახლის ბინადართათვის სამუშაოს შოვნას ითვალისწინებს.
