შიდა ქართლში, სოფელ შავშვებში მცხოვრებმა დევნილებმა საშემოდგომო მიწის სამუშაოები დაიწყეს. 168 დევნილი ოჯახი 100 ჰექტარ მიწის ნაკვეთს ამუშავებს, შემდეგ ხორბალს დათესავს. მოსავალი მთლიანად მათი იქნება.
პროექტი "აგროკულტურის ანა-ბანა" პოლონური არასამთავრობო ორგანიზაცისა („ჟივეცის განვითარების ფონდი") და საქართველოს ხელისუფლების დახმარებით ხორციელდება და მისი მიზანია დევნილებისთვის მაღალი ხარისხის სასოფლო-სამეურნეო პროდუქციის წარმოებაში ხელშეწყობა.
სამუშაოების დაწყებას ოკუპირებული ტერიტორიებიდან იძულებით გადაადგულებულ პირთა, განსახლებისადა ლტოლვილთა მინისტრი კობა სუბელიანი, შიდა ქართლში პრეზიდენტის რწმუნებული ზურაბ არსოშვილი და პოლონეთის ელჩი საქართველოში ურშულა დოროშევსკა დაესწრო.
„დღეს 100 ჰეგტარი მიწის დამუშავება დავიწყეთ. ამას უძღვოდა კოოპერატივის შექმნა, სადაც დევნილები გაერთიანდნენ. მანამდე კი დევნილები თავად იყვნენ პოლონეთში ჩასულები და ტრეინინგები გაიარეს. ადრე არსებული საბჭოური სტანდარტები შეიცვალა, უფრო მეტ გამოცდილებას ეზიარნენ და სწორედ თანამედროვე სტანდარტებით აკეთებენ უკვე ყველაფერს. მთავარია, რომ ეს შემოსავალი მთლიანად მათი იქნება. თუ ყველაფერი კარგად წავიდა, თითოეულ ოჯახს, თვეში სავარაუდოდ 3000 ლარამდე შემოსავალი გაუჩნდება. თანხის გარკვეულ ნაწილს ისევ მიწის დამუშავებაში ჩააბრუნებენ და ერთი მსხვილი კოოპერატივი იარსებებს, რომელიც ბაზრის გარკვეულ ნაწილს ხორბლით მოამარაგებს. საწყისი პოზიციები ძალიან კარგია. მიხარია, რომ დევნილ მოსახლეობას შემოსავალი უჩნდება და დამოუკიდებლები ხდებიან", - განაცხადა მინისტრმა კობა სუბელიანმა და ღნიშნა, აღნიშნული პროექტი დევნილებს საშუალებას აძლევს, შემოსავალი გაუჩნდეთ და დამოუკიდებლები გახდნენ.
პოლონეთის ელჩის თქმით, პოლონეთი საქართველოს, მათ შორის დევნილ მოსახლეობას ყოველთვის გვერდში დაუდგება.
„პოლონეთის მთავრობას გამოყოფილი აქვს თანხები განვითარების ხელშეწყობისთვის, ისევე როგორც ევროსაბჭოს, რომელიც მოიცავს საერთაშორისო დახმარებას საქართველოსთვის. ჩვენთვის დევნილები საკითხი პრიორიტეტულია, მაგრამ, თანხის გარდა, ასევე მნიშვნელოვანია გამოცდილება. ჩვენ ყოველთვის გვერდში დაგიდგებით და ხელს შეგიწყობთ. ეს პროექტი ძალიან მნიშვნელოვანია და პერიოდულად ჩამოვალ შიდა ქართლში, რომ მის შედეგებს დავაკვირდე", - განაცხადა პოლონეთის ელჩმა.
