საქართველოს პრეზიდენტმა ღრმა მწუხარება გამოხატა უბადლო მსახიობისა და შემოქმედის ზინაიდა კვერენჩხილაძის გარდაცვალების გამო და სამძიმარი გამოუცხადა მისი ოჯახის წევრებსა და ახლობლებს. ამის შესახებ ინფორმაციას პრეზიდენტის ადმინისტრაცია ავრცელებს. სამძიმრის წერილში, რომელიც პრეზიდენტმა ზინაიდა კვერენჩხილაძის ოჯახს გაუგზავნა, ხაზგასმულია, რომ იგი იყო არა მხოლოდ დამსახურებული ხელოვანი და მსახიობი, არამედ შესანიშნავი პიროვნება და პედაგოგი.
„ქალბატონი ზინაიდა ქართული თეატრის გამორჩეული სახე იყო. მისი განუმეორებელი ნიჭით, თვითმყოფადობით აღბეჭდილი კულტურული მემკვიდრეობა, რომელზეც თაობები აღიზარდა, აღსავსეა სილამაზითა და სიყვარულით. სრულიად საქართველოსთან ერთად ვიზიარებ მისი გარდაცვალებით გამოწვეულ ტკივილსა და მწუხარებას", - აღნიშნულია სამძიმრის წერილში.
ზინაიდა კვერენჩხილაძე 79 წლის ასაკში ინსულტის დიგნოზით გარდაიცვალა. კვერენჩხილაძე რუსთაველის თეატრში 50 წლის განმავლობაში მუშაობდა. რუსთაველის თეატრთან წელს მისი სახელობის ვარსკვლავიც გაიხსნა.
