"ქრისტიან-დემოკრატები" ყველა ასაკობრივი პენსიონერის სახელმწიფო დაზღვევით უზრუნველყოფას კიდევ ერთხელ მოითხოვენ. ამის შესახებ მაგდა ანიკაშვილმა თელავში, პენსიონერებთან შეხვედრაზე განაცხადა. პარლამენტის წევრის თქმით, მინიმალური პენსიის 100 ლარამდე გაზრდის და ქდმ-ს ინიციატივის შედეგად დედაქალაქსა და რეგიონებში პენსიის გათანაბრების მიუხედავად, ყველაზე დაუცველები ქვეყანაში კვლავ პენსიონერები რჩებიან.
"დღეს არსებული სახელმწიფო პროგრამები ძალზე არაეფექტურად მუშაობს და ჩვენ უკვე დიდი ხანია ვითხოვთ, ამ პროგრამების გაუქმების შედეგად გამოთავისუფლებული თანხებით მთავრობამ ყველა პენსიონერი დააზღვიოს. საუბარია ბიუჯეტით გათვალისწინებული 184 მილიონი ლარიდან 640 ათასი პენსიონერის სადაზღვევო პოლისით უზრუნველყოფაზე. ეს უნდა იყოს უმწეოთა სადაზღვევო პაკეტის იდენტური პოლისი, ოღონდ ერთი განსხვავებით - დასაზღვევი კონტიგენტის გათვალისწინებით, აუცილებელია გაიზარდოს მედიკამენტების კომპონენტი, რისი განხორციელება არსებული ბიუჯეტითაც თავისუფლად შესაძლებელია" - განაცხადა მაგდა ანიკაშვილმა.
გიორგი ახვლედიანის თქმით, ფრაქცია "ქრისტიან-დემოკრატები" პარლამენტის პირველივე სესიაზე დააყენებს ამ საკითხს:
"ქვეყანაში, სადაც საარსებო მინიმუმი 150 ლარზე მეტია, ასლარიანი პენსიით ვერ მოხერხდება ბევრი პენსიონერის ფიზიკურად გადარჩენა. ამიტომ აუცილებელია ხელისუფლებამ გაითვალისწინოს ჩვენი მოთხოვნა და იმ პროგრამების ნაცვლად, რომელთა შესახებაც ადამიანებმა ხშირად არაფერი იციან, დააზღვიონ ყველა ასაკობრივი პენსიონერი. ეს იქნება დაახლოებით იგივე დანახარჯებზე გათვლილი, მაგრამ გაცილებით ეფექტური პროექტი" - განაცხადა გიორგი ახვლედიანმა.
პენსიონერებთან შეხვედრის შემდეგ "ქრისტიან-დემოკრატების" ლიდერები თელავის რაიონის სოფელ ართანის მოსახლეობასაც შეხვდნენ. მათ ართანელებს მაჟორიტარი დეპუტატობის კანდიდატი ნიკოლოზ ლაშხი წარუდგინეს და 2 ოქტომბრის შუალედურ არჩევნებში მხარდაჭერა სთხოვეს.
