საქართველოს პროფკავშირების გაერთიანების ინფორმაციით, შ.პ.ს. "ევრაზიანსთილსის" ქარხანა „ჰერკულესის" მუშებზე ადმინისტრაცია ზეწოლას ახორციელებს.
"მუშებს ქარხნის უსაფრთხოების უფროსის რეზო დიაკონიძის დანაბარები და მუქარა გადასცეს. კერძოდ, მუშები „გააფრთხილეს", რომ, თუკი გაბედავენ და გაფიცვაში მიიღებენ მონაწილეობას, მათ დაიჭერენ", - აცხადებენ პროფკავშირებში.
ამასთან, როგორც მათ "ჯი-ეიჩ-ენს" აცნობეს, 2010 წლის ივნისში, ქარხნის 7 მუშა, რომლებმაც ხელფასის დაგვიანება გააპროტესტეს, დააკავეს და, ხულიგნობის ბრალდებით, 20-20-დღიანი პატიმრობა მიუსაჯეს.
"მიუხედავად მუქარისა, ქარხნის თანაშრომლები უკან დახევას არ აპირებენ და დღეს, 13 საათზე, გამაფრთხილებელ გაფიცვას გამართავენ. ამის გაკეთება მათ საწარმოში არსებული გაუსაძლისი და არაერთი თხოვნის მიუხედავად, გამოუსწორებელი შრომითი პირობების გამო გადაწყვიტეს", - აღნიშნავენ პროფკავშირებში.
